Kotu Ta Umarci A Tsare Matashin da Ake Zargi da Zuba Wa Mahaifiyarsa Miya Mai Zafi a Kano

Kotun Shari’ar Musulunci da ke yankin Post Office a Kano ta bayar da umarnin tsare wani matashi mai suna Ruben Jiliyus a gidan gyaran hali, bisa zargin dukan mahaifiyarsa tare da zuba mata miyar zafi.

A zaman kotun da Mai shari’a Hamza Garba Malafa ya jagoranta, lauyan masu gabatar da ƙara, Barrister Awaisu Sani Lawan, ya karanta tuhume-tuhumen da ake yi wa wanda ake zargin.

Bisa ga bayanan tuhumar, lamarin ya faru ne da misalin ƙarfe 8 na safiyar Lahadi, 8 ga Nuwamba, 2026, lokacin da mahaifiyarsa mai suna Amina ta shiga tsakani a wata sa-in-sa da ta kaure tsakaninsa da ƙanwarsa.

Ana zargin matashin ya ɗauki tukunyar miyar da ke da zafi, sannan ya zuba wa mahaifiyarsa a jikinta, lamarin da ya jikkata ta tare da ƙone mata fuska.

Bayan an karanta masa tuhume-tuhumen, Jiliyus ya amsa laifin, amma ya shaida wa kotun cewa yana cikin maye a lokacin da lamarin ya faru, kuma sai daga baya ne ya fahimci abin da ya aikata.

Alƙalin ya kuma tambaye shi ko ya amince a yi masa shari’a bisa dokar Musulunci, inda ya amsa da cewa ya amince.

Daga nan ne kotun ta bayar da umarnin tsare shi a gidan gyaran hali, tare da ɗage sauraron ƙarar zuwa ranar 23 ga Disamba, 2026, domin ci gaba da shari’ar.