Jami’an tsaro sun ceto mutane 19 daga hannun masu garkuwa da mutane

Rundunar ƴan sandan jihar Zamfara ta bayyana ceto mutane  19 da aka yi garkuwa da su.

A cikin wata sanarwa da ta fitar  rundunar ta bayyana cewa an ceto mutanen ne ranar Asabar da misalin ƙarfe 10 na safe, a wani samame na haɗin gwiwa da jami’an Sashen Yaƙi da Garkuwa da Mutane, jami’an tsaron Gidan Gwamnati, jami’an Hukumar Tsaro ta DSS da kuma mafarauta na yankin suka gudanar.

An gudanar da aikin ceton ne bayan samun sahihan bayanan sirri kan inda waɗanda aka sace suke.

Sanarwar da mai magana da yawun rundunar ƴan sandan jihar, DSP Yazid Abubakar, ya fitar, ta ce an samu dukkan mutane 19 cikin ƙoshin lafiya kuma an riga an haɗa su da iyalansu.

Kwamishinan ’Yan Sandan jihar, Ahmad Muhammad Bello, ya yabawa jami’an tsaron da suka yi aikin saboda jajircewa, ƙwarewa da kuma haɗin kai da suka nuna, wanda ya kai ga nasarar ceton mutanen.

Ya kuma jaddada ƙudirin rundunar wajen yaki da garkuwa da mutane da sauran laifuffuka, tare da kira ga al’umma da su riƙa bai wa jami’an tsaro sahihan bayanai a kan lokaci.

Loading

Signing-in 3 seconds...

Signing-up 3 seconds...