Amaechi Ya Ce ADC Za Ta Kayar Da Tinubu A Jihohi 13 Na Arewa Maso Gabas Da Yamma

Mataimakin dan takarar shugaban kasa na jam’iyyar ADC, Rotimi Amaechi, ya bayyana cewa jam’iyyarsu za ta kayar da Shugaba Bola Tinubu a dukkan jihohi 13 na Arewa maso Gabas da Arewa maso Yamma a zaben 2027.

Amaechi ya bayyana hakan ne a ranar Asabar, yayin gangamin yakin neman zaben shugaban kasa na ADC da aka gudanar a Bauchi. Ya kuma ce jam’iyyar za ta kalubalanci APC a yankunan Kudu maso Kudu da Arewa ta Tsakiya.

Tsohon ministan sufuri ya yi hasashen cewa ADC za ta lashe jihohin Neja, Kogi da Nasarawa cikin sauki.

Ya kuma zargi APC da shirin maimaita abin da ya ce ta aikata a zaben 2023, yana mai cewa a wannan karon jam’iyyarsu ba za ta amince da hakan ba.

Amaechi ya ce ADC ce kadai jam’iyyar da ke da karfin fada a ji a jihohi 13 na Arewa maso Gabas da Arewa maso Yamma. Ya kuma yi ikirarin cewa Tinubu na da rinjaye a jihohi biyar ne kawai a Kudu maso Yamma.

Ya kara da cewa jam’iyyar Allied Peoples Movement (APM) za ta iya karbe wani karin jiha a yankin daga APC.

Dangane da Kudu maso Gabas kuwa, Amaechi ya ce Tinubu ba zai samu gagarumar nasara a yankin ba, yana mai bayyana kwarin gwiwarsa kan nasarar ADC a zaben mai zuwa.