Gwamnatin jihar Bauchi ta dakatar da wani sarki tare da kafa masa kwamitin bincike

Gwamnatin Jihar Bauchi ta dakatar da Mai Martaba Alhaji Aliyu Lame, Sarkin Lame da ke Karamar Hukumar Toro, bisa zarge-zargen rashin da’a da kuma cin zarafin ofis.

Har ila yau, gwamnatin ta amince da kafa kwamitin bincike na mutane 12 domin gudanar da bincike kan zarge-zargen da ake yi wa basaraken.

Hakan na kunshe ne cikin wata sanarwa da mai ba gwamna Bala Mohammed shawara na musamman kan harkokin yaɗa labarai da hulɗa da jama’a, Malam Mukhtar Gidado, ya fitar a Bauchi ranar Asabar.

A cewar sa, gwamnan ya amince da daukar matakin ne bayan samun koken al’umma da rahotannin sirri daga shugabannin al’umma, masu ruwa da tsaki da kuma hukumomin tsaro.

Gidado ya bayyana cewa zarge-zargen da ake yiwa sarkin sun hada da tsoma baki ba bisa ka’ida ba a harkokin gudanar da filaye, karɓar haraji da kudade ba tare da izini ba, tsoma baki cikin ayyukan kamfanonin hakar ma’adinai, da sauran laifuffukan rashin da’a.

Ya kara da cewa wadannan zarge-zarge sun haifar da zaman dar-dar da tashin hankali a Masarautar Lame tare da jawo damuwa kan zaman lafiya da tsaro.

“Tun da farko, Ma’aikatar Kananan Hukumomi da Harkokin Masarautu ta bukaci Sarkin ya bayar da bayani kan zarge-zargen, kuma ya mika amsoshinsa a rubuce.

“Amma gwamnati ta ga cewa bayanan da ya bayar ba su gamsar ba, don haka ta ga ya dace a gudanar da bincike mai zaman kansa kan lamarin.”

Ya ce kwamitin binciken, wanda tsohon mataimakin sufeto janar na ‘ƴan sanda, Sani Mohammed mai ritaya, ke jagoranta, ya kunshi wakilan hukumomin tsaro, ma’aikatun gwamnati masu ruwa da tsaki, karamar hukumar Toro da sauran hukumomin gwamnati.

A cewarsa, an bai wa kwamitin makonni uku domin binciken zarge-zargen, nazarin takardu masu alaka da lamarin, gayyatar wadanda abin ya shafa da kuma gabatar da sakamakon bincike da shawarwarinsu ga gwamnati.

Mai magana da yawun gwamnatin ya kuma bayyana cewa dakatarwar mataki ne na wucin gadi da aka dauka domin kare mutuncin binciken tare da hana yiwuwar yin tasiri ga shaidu ko kuma lalata takardun hukuma.

Ya ce an umurci Sarkin da ya ci gaba da zama a cikin Masarautar Lame sai dai idan an ba shi izini daban, sannan ya guji tsoma baki cikin harkokin gudanarwa, al’adun masarauta da sauran ayyukan hukuma a lokacin dakatarwar.

Gidado ya kuma ce gwamnati ta umurci babban ɗan Majalisar Masarautar, Alhaji Bala Gumau, da ya rika kula da harkokin gudanarwar masarautar na yau da kullum a matsayin wanda zai rike mukamin na wucin gadi.

Ya kara da cewa gwamnati tana kira ga mazauna Masarautar Lame da karamar hukumar Toro, shugabannin al’umma, masu sarauta da matasa da su kasance masu natsuwa, zaman lafiya da bin doka, tare da bai wa hukumomin tsaro da kwamitin binciken cikakken hadin kai.