Jami’an tsaro sun kashe kwamandan ISWAP A a jihar Ondo

Abdussamad Ohida, babban jagoran ISWAP wanda aka fi sani da Anwar, an kashe shi a wani samame na sirri da rundunar sojojin Najeriya tare da DSS da Amotekun suka kai a dajin Owo, jihar Ondo.

Majiyoyin tsaro sun bayyana cewa Ohida yana shirin kai hare-hare a jihohin kudu, musamman a lokacin bukukuwan karshen shekara, tare da nufin tada hankali a lokacin zaben 2027. Wannan samame ya biyo bayan bayanan sirri da aka samu daga binciken Abu Uwais, tsohon jagoran ISWAP da aka kama a shekarar 2023.

Ohida ya taka muhimmiyar rawa wajen kai hare-hare da dama a Najeriya. An danganta shi da harin ofishin ‘yan sanda na Ipele a Owo a ranar 31 ga Disambar shekarar 2025, inda aka kwace bindigogi AK-47 guda takwas sannan aka tarwatsa ofishin da bam. Haka kuma shi ne ya jagoranci hari kan shingen sojoji dake kan hanyar Suleja–Zuba a jihar Neja a shekarar 2022, harin gidan gyaran hali na Kuje a Abuja, da kuma hare-hare da dama a jihar Kogi, ciki har da harin kan shingen binciken sojojin ruwa dake  Okene a shekarar 2020.

Kashe Ohida na nuna babban cikas ga ISWAP, musamman a kokarinsu na fadada ayyukan ta’addanci a tsakiya da kudancin Najeriya.

Wannan nasarar da aka samu ta biyo bayan kashe jagoran ISIS Abu Bilal al-Minuki a ‘yan watannin da suka gabata, kuma tana nuna yadda jami’an tsaro na Najeriya ke kara samun nasara wajen dakile ayyukan ta’addanci. Wannan na iya zama babbar nasara wajen kare rayukan fararen hula da kuma tabbatar da tsaron kasa.