Mutane 32 ne ke cikin jirgin saman sojin Najeriya da ya yi a hatsari a jihar Ondo

Festus Keyamo, ministan sufurin jiragen sama, ya bayyana cewa fasinjoji 25 da ma’aikata 7 suna cikin jirgin sojin da ya yi hatsari a jihar Ondo.

Jaridar TheCable ta ruwaito cewa jirgin ya yi hatsari kusa da sansanin sojojin ruwa a yankin Igbokoda a ranar Litinin. Rundunar Sojin Sama ta Najeriya (NAF) ta tabbatar da mallakar jirgin, tana mai cewa yana kan hanyarsa ta zuwa Legas daga Benin, babban birnin jihar Edo.

A cikin wata sanarwa da ya wallafa a X, ministan ya ce masu kula da zirga-zirgar jiragen sama sun sanar da shi game da ɓacewar jirgin. Duk ƙoƙarin tuntubar jirgin ta hanyar rediyo ya ci tura. Daga baya aka tabbatar da cewa jirgin sojin ya yi hatsari kusa da sansanin sojojin ruwa a Igbokoda, kuma an gano wasu tarkacen  jirgin kuma ana  ci gaba da aikin ceto. Keyamo ya ce bayanan farko sun nuna cewa akwai fasinjoji 25 da ma’aikata 7 a cikin jirgin.

Ya kara da cewa duk da cewa ikon kula da jiragen soji ba ya karkashin ma’aikatarsa, ya yi magana da Babban Hafsan Sojin Sama, Air Marshal Sunday Kelvin Aneke, inda ya yi alkawarin bayar da cikakken goyon baya da taimako wajen aikin ceto. Ministan ya ce za a ci gaba da bayar da ƙarin bayani idan ya samu.

Wannan hatsarin ya tayar da hankula a cikin al’ummar yankin n dake bakin teku a safiyar Litinin. An bayyana cewa jirgin ana amfani da shi wajen aikin leƙen asiri, sa ido da kuma ayyukan tsaron ruwa.