Kwamitin binciken mutuwar matasa 37 a jihar Niger ya bukaci karin lokaci

Kwamitin  da gwamnatin tarayya ta kafa  mai wakilai 10 da zai gudanar da bincike kan mutuwar mutane 37 masu haƙar ma’adanai ba bisa ka’ida ba a lokacin da su ke tsare a ofishin hukumar tsaro ta Civil Defense dake Minna babban jihar Niger  ya nemi karin makonni biyu kafin ya kammala rahoton bincikensa.

A taron manema labarai da aka gudanar a ranar Talata, shugaban kwamitin binciken, Jonathan Kure, wanda ya yi ritaya a matsayin mataimakin darakta-janar na hukumar tsaro ta DSS, ya bayyana cewa kwamitin ya samu “ci gaba mai ma’ana”.

Kure ya ce kwamitin ya ziyarci Minna, ya duba wurin da aka tsare mutanen,  ya gudanar da binciken kwakwaf  don gano musabbabin mutuwarsu,ya karɓi bayanan shaidu daga jami’an NSCDC, matasan da  suka tsira da ransu, iyalai da sauran shaidu, tare da tattara takardu da shaidun shedun masana binciken kwakwaf.

Ya bayyana cewa binciken farko ya nuna akwai gibin tsarin aiki, da kuma wuce gona da iri  daga jami’an tsaro, inda ya kara da cewa ana bukatar ƙarin kwarewa wajen gudanar da irin waɗannan lamurra masu sarkakiya.

Sai dai shugaban kwamitin ya ce har yanzu ba su kammala aikin ba saboda wasu dalilai.

Rahoton ya kamata a mika shi tun ranar 7 ga Oktoba.

Kure ya bayyana cewa akwai yawan bayanan shaidu da takardu da ke bukatar a duba su da kyau; akwai rahotannin masana da ake jira domin tabbatar da ainihin dalilin mutuwar; da kuma bukatar bai wa duk wanda aka ambata ciki har da jami’an da aka dakatar damar kare kansu, domin rahoton kwamitin ya kasance mai inganci kuma ya samu amincewar jama’a.

Ya ce gwamnatin tarayya ta amince da bukatar kwamitin na karin lokaci na makonni biyu.