Tinubu ya bawa jami’an tsaro umarnin kawo karshen yan bangar siyasa

Shugaba Bola Tinubu,ya gargadi ‘yan siyasa da magoya bayansu da su guji tashin hankali yayin da ake shirin gudanar da babban zaɓen shekarar 2027. A cikin wata sanarwa da ya sanya wa hannu, ya ce gwamnati ba za ta lamunci duk wani nau’in rikici na siyasa ba.

Tinubu ya yi Allah wadai da rahotannin tashin hankali da suka faru a wasu tarukan siyasa, yana mai cewa yaƙin neman zaɓe ya kamata ya mai da hankali kan batutuwan da za su inganta rayuwar jama’a da ci gaban ƙasa.

Ya jaddada cewa siyasa ya kamata ta kasance gasa ta ra’ayoyi da manufofi, ba ta ƙiyayya ko rikici tsakanin jam’iyyu da magoya bayansu ba.

Shugaban ya kuma tabbatar da aniyarsa na tabbatar da zaɓe cikin lumana, adalci da ‘yanci, tare da roƙon dukkan jagororin siyasa da mabiyansu su gudanar da harkokinsu cikin natsuwa da mutunta juna.

Tinubu ya ce bambancin jam’iyya ko buri na siyasa bai kamata ya mayar da ‘yan Najeriya maƙiyan juna ba, yana mai cewa dukkan ‘yan ƙasar mambobi ne na gida ɗaya da ke aiki domin ci gaban ƙasa.

Ya kuma sake umartar hukumomin tsaro da su ɗauki tsauraran matakai kan masu tayar da hankali, yana mai cewa an ba su izinin fuskantar daba da duk wasu ayyukan da suka saɓa wa dimokuraɗiyya domin tabbatar da zaman lafiya da tsaro a lokacin zaɓe.