Kwamishinan kasuwancin na Zamfara ya rasu yana da shekaru 50

Tasiu Shinkafi, kwamishinan kasuwanci na Jihar Zamfara, ya rasu yana da shekaru 50 a duniya.

Gwamnatin Jihar Zamfara ta bayyana cewa Shinkafi ya rasu ne a ranar Laraba a wani asibiti da ke Kaduna bayan gajeruwar rashin lafiya.

Gwamnan jihar Zamfara, Dauda Lawal, ya bayyana alhininsa kan rasuwar kwamishinan, yana mai cewa babban rashi ne wanda ba za a iya maye gurbinsa ba ga gwamnatin jihar da al’ummarta.

A cikin wata sanarwa da mai magana da yawun gwamnan, Sulaiman Bala Idris, ya fitar a ranar Alhamis, Lawal ya yabawa Shinkafi bisa jajircewarsa, gaskiyarsa da sadaukarwarsa wajen bautawa jihar.

Gwamnan ya ƙara da cewa Shinkafi ya taɓa riƙe mukamin kwamishinan matasa da wasanni kafin a mayar da shi ma’aikatar kasuwanci.

Sanarwar ta bayyana cewa “Cikin matsanancin baƙin ciki da  miƙa wuya baki ɗaya ga nufin Allah Maɗaukakin Sarki, mun karɓi labarin rasuwar Kwamishinan Kasuwanci, Tasiu Musa Shinkafi.

“Rasuwar Tasiu babban rashi ne ba ga iyalansa kaɗai ba, har ma ga gwamnatin jihar da al’ummar Zamfara baki ɗaya.

“Za a ci gaba da tunawa da shi saboda sadaukarwarsa, gaskiyarsa da jajircewarsa wajen hidimtawa Jihar Zamfara.

“Ya yi aiki da ƙwazo a matsayin Kwamishinan Matasa da Wasanni kafin a sauya masa ma’aikata zuwa Ma’aikatar Kasuwanci.

“A matsayinsa na muhimmin memba a gwamnatina kuma ɗan’uwa a hidima, gudunmawar da ya bayar a fannin mulki, siyasa da hidimar jama’a za ta kasance abin tunawa.

“Muna roƙon Allah Maɗaukakin Sarki Ya gafarta masa kura-kuransa, Ya kuma ba iyalansa ƙarfin guiwar jure wannan babban rashi.