Ƴan Sanda Sun Kama Mutumin da Ake Zargi da Yi wa Mai Jego Fyaɗe Tare Da Ɗaukar Bidiyon Tsiraicinta a Abuja

Rundunar ’yan sandan babban birnin tarayya Abuja ta kama wani mutum mai suna Ahmed Usman bisa zargin yi wa wata mata mai shayarwa fyaɗe tare da ɗaukar bidiyon tsiraicinta, bayan ta gaza biyan bashin Naira 600,000 da ya ba ta.

Jami’ar hulɗa da jama’a ta rundunar ’yan sandan FCT, SP Josephine Adeh, ce ta bayyana hakan a wani bidiyo da ta wallafa a shafinta na Facebook a ranar Laraba, inda aka nuna wanda ake zargin.

Adeh ta ce mutumin ya shahara wajen ba zawarawa da mata masu rauni lamuni, sannan ya riƙa karɓar kuɗin ruwa a kowane mako.

Ta bayyana cewa an kai rahoton lamarin ga ’yan sanda a ofishin ’yan sanda na Lugbe a ranar 5 ga Nuwamba, bayan wanda ake zargin ya yi awon gaba da matar tare da yi mata fyaɗe bisa zargin ta kasa biyan kuɗin ruwa na mako.

A cewar kakakin ’yan sandan, mutumin ya ba matar bashin Naira 600,000, tare da sharadin cewa za ta riƙa biyan Naira 30,000 a duk mako a matsayin kuɗin ruwa, ban da babban bashin.

Adeh ta ce matar ta kasa biyan kuɗin makon saboda ƙarancin ciniki, sannan ta je wurin wanda ake zargin da Naira 24,000 da ta samu.

Ta yi zargin cewa mutumin ya tura matar cikin motarsa, ya yi mata barazanar amfani da wuƙa, sannan ya tuka ta zuwa wani keɓantaccen wuri a bayan fadar hakimi da ke Lugbe, inda ya yi mata fyaɗe.

Jami’ar ta ƙara da cewa wanda ake zargin ya yi wa matar barazanar kashe ta idan ba ta biya bashin ba. Hakan ya sa ta nemi kuɗi ta tura masa kafin daga bisani ta kai ƙara ga ’yan sanda.

Adeh ta ce jami’an ’yan sanda sun bi sawun mutumin har suka kama shi. Ta ƙara da cewa ya yi ƙoƙarin tserewa da wani jami’in ɗan sanda a cikin motarsa kafin daga bisani aka cafke shi.

Wanda ake zargin ya amsa wasu daga cikin laifukan

A yayin da ake yi masa tambayoyi, Usman ya amsa cewa ya ba matar bashin Naira 600,000 kuma yana karɓar Naira 30,000 a kowane mako.

Ya kuma amsa cewa ya umarce ta da ta cire tufafinta, ya sadu da ita ta hanyar da ba ta dace ba, sannan ya ɗauki bidiyon tsiraicinta.

A cikin kalamansa, ya ce: “Ina ba mata lamuni. Wannan matar ta karɓi bashin Naira 600,000 daga gare ni. A al’ada tana biyan Naira 30,000 a kowane mako. A ranar da ta kasa biya, na kira ta na ce ta zo. Ta zo wurin motata kirar Toyota, sai na ce ta cire kayanta. Bayan na ɗauki bidiyonta, sai na sadu da ita.”

Da Adeh ta tambaye shi yadda ya ɗauki bidiyon, Usman ya ce ya umarci matar ta cire tufafinta, sannan ya ɗauki bidiyonta tsirara, har ma ya umarce ta da ta buɗe al’aurarta domin ya ɗauki hotonta.

Wanda ake zargin ya kuma amsa cewa ya tuka motarsa tare da wani jami’in ɗan sanda a lokacin da ake ƙoƙarin kama shi. Ya ce daga baya ne ya gane cewa jami’in shi ne babban jami’in ’yan sanda na sashen (DPO), saboda haka ya juya ya mayar da shi inda ya ɗauke shi.

Usman, wanda ya ce ɗan Jihar Nasarawa ne, ya bayyana cewa yana da mata da ’ya’ya shida. A yayin tattaunawar, ya nemi a yafe masa, yana mai cewa yana nadamar abin da ya faru saboda matarsa da ’ya’yansa.

Ya ce, “Ina matuƙar baƙin ciki saboda ’ya’yana da matata. Don Allah ku ba ni dama ta biyu. Zan zama uba nagari kuma ɗan ƙasa nagari.”

Adeh ta ce har yanzu ana ci gaba da gudanar da bincike kan lamarin, inda rundunar ke haɗin gwiwa da ƙungiyar lauyoyin mata ta duniya (International Federation of Women Lawyers – FIDA) wajen gudanar da shari’ar.