Najeriya Ta Samu Ƙarin Kujerun Aikin Hajji

Hukumar Alhazai ta Ƙasa NAHCON ta bayyana cewa Gwamnatin Saudiyya ta amince da ƙarin kujeru 10,000 na aikin Hajji ga Najeriya a shekarar 2027. 

A cikin wata sanarwa da aka fitar a ranar Alhamis, hukumar ta ce wannan ci gaba ya biyo bayan tattaunawa tattaunawa tare da diflomasiyya tsakanin gwamnatin tarayyar najeriya da ta Saudiyya. 

Ƙarin kujerun ya kawo yawan jimillar kujerun da aka ware wa Najeriya daga 50,000 zuwa 60,000. 

NAHCON ta ce an raba waɗannan kujerun kamar haka: 
– 7,500 kujeru ga Hukumomin Jin Dadin Alhazai na Jihohi,  
– 2,500 kujeru ga manyan kamfanonin shirya tafiye-tafiye  guda bakwai (7). 

Shugaban NAHCON, Ambasada Ismail Abba Yusuf, ya nuna godiya ga gwamnatin tarayyar Najeriya ƙarƙashin jagorancin Shugaba Bola Ahmed Tinubu bisa goyon baya da kulawa ga harkar Hajji da jin dadin alhazai. 

Ya kuma yi godiya ga Sarkin Saudiyya da gwamnatin Saudiyya, musamman ministan Hajji da Umrah, Dr. Tawfiq bin Fawzan Al-Rabiah, da mataimakin minista, Dr. Abdul Fattah bin Sulaiman Mashat, bisa wannan kyakkyawan alheri da haɗin gwiwa da Najeriya. 

Ambasada Yusuf ya ce ƙarin kujerun alama ce ta kyakkyawar dangantaka da haɗin gwiwa tsakanin Najeriya da Saudiyya wajen sauƙaƙa tafiyar alhazai. Ya tabbatar da cewa za a gudanar da rabon kujerun cikin gaskiya, tsari da bin ƙa’ida tare da haɗin gwiwar hukumomin jihohi da kamfanonin yawon Hajji masu lasisi. 

Ya jaddada cewa NAHCON za ta ci gaba da tabbatar da cewa aikin Hajji ya kasance mai sauƙi da araha ga ‘yan Najeriya tare da kiyaye ingantaccen tsarin aiki, bin doka, da kula da jin dadin alhazai. 

Ambasada Yusuf ya ƙara tabbatar da cewa hukumar za ta ci gaba da aiki tare da hukumomin Saudiyya da sauran masu ruwa da tsaki don tabbatar da kyakkyawan shiryawa da gudanar da Aikin Hajjin 2027 tare da kare mutunci da jin dadin alhazai na Najeriya.