Mutane Uku Sun Mutu Yayin Da Aka Samu Turmutsitsi A Gidan Gwamnatin Neja

Akalla mutane uku sun mutu, yayin da wasu da dama suka jikkata sakamakon turmutsitsi da ya afku a Gidan Gwamnatin Jihar Neja da ke Minna.

An ce lamarin ya faru ne a daren Talata, lokacin da dimbin jama’a suka taru a Gidan Gwamnatin. Wadanda suka jikkata na samun kulawar likitoci a Babban Asibitin Minna.

Rahotanni sun ce taron na da alaka da kokarin jami’an gwamnati na tattaunawa da wasu matasa da ake zargin suna shirin gudanar da zanga-zanga kan mutuwar masu hakar ma’adinai 37 da ta faru a jihar a baya-bayan nan.

Daga cikin wadanda aka tabbatar da mutuwarsu akwai wata mata mai suna Dije da ‘yarta, Hurairat, wadanda ‘yan gudun hijira ne daga al’ummar Allawa da ke karamar hukumar Shiroro.

An rawaito cewa mijin Hurairat mai suna Abubakar, ‘yan bindiga sun kashe shi a shekarar 2023 a kan hanyar Allawa zuwa Pandogari. Hakan ya tilasta mata barin garin zuwa Minna a matsayin ‘yar gudun hijira bayan mazauna yankin sun bar al’ummar sakamakon hare-haren ‘yan bindiga da suka yawaita.

Majiyoyi sun ce Dije, wadda ke zaune tare da mijinta a Gurmana, ta je ziyartar ‘yarta ne lokacin da suka ji labarin cewa za a raba kudi a Gidan Gwamnatin. Daga nan ne su biyun suka shiga cikin taron jama’ar.

Wani dan gudun hijira daga Allawa, Mallam Musa Allawa, ya shaida wa manema labarai cewa za a yi jana’izar mahaifiyar da ‘yarta a safiyar Laraba.

Wasu jami’an da gwamnatin jihar ta nada sun wallafa a shafukan sada zumunta cewa matasan sun taru ne a Gidan Gwamnatin domin nuna goyon baya ga Gwamna Mohammed Umaru Bago.

Sai dai wata majiya daga gwamnatin jihar ta ce daga baya mutane da dama, ciki har da mata, sun shiga wajen taron bayan sun ji rade-radin cewa gwamnan zai raba N10,000 ga wadanda suka halarta.

Da aka tuntubi Babban Sakataren Yada Labarai na Gwamnan, Bologi Ibrahim, ya ce gwamnatin jihar za ta fitar da sanarwar hukuma kan lamarin.

Shi ma Kakakin Rundunar ‘Yan Sandan Jihar Neja, SP Wasiu Abiodun, ya ce zai tabbatar da sahihancin bayanan tare da samar da karin bayani.