Tinubu Zai Yi Wa ‘Yan Najeriya Jawabi Yayin Bikin Ranar ’Yancin Kai

Shugaban Kasa Bola Ahmed Tinubu zai yi wa ‘yan Najeriya jawabi a yau Alhamis, 1 ga Oktoba, da karfe 7:00 na safe, domin bikin cika shekaru 66 da samun ‘yancin kan Najeriya.

Mai ba shugaban kasa shawara kan harkokin yada labarai da dabarun sadarwa, Bayo Onanuga, ne ya bayyana hakan a wata sanarwa da ya fitar ranar Laraba.

Onanuga ya bukaci gidajen talabijin da rediyo da sauran kafafen yada labarai na zamani su hada kai da gidajen watsa shirye-shiryen Nigerian Television Authority (NTA) da Federal Radio Corporation of Nigeria (FRCN) domin watsa jawabin shugaban kasa.

Wannan shi ne karo na hudu da Tinubu zai yi wa ‘yan Najeriya jawabi a ranar samun ‘yancin kai tun bayan hawansa mulki a ranar 29 ga Mayu, 2023.

Jawabin shugaban kasa a ranar 1 ga Oktoba ya zama al’ada wajen tunawa da samun ‘yancin kan Najeriya daga mulkin mallakar Birtaniya a ranar 1 ga Oktoba, 1960.

Ana sa ran Tinubu zai yi magana kan halin da kasar ke ciki tare da bayyana manufofi da matakan da gwamnatinsa ke dauka.

Kamar yadda aka yi a bara, gwamnatin tarayya ta bayyana cewa bikin ranar samun ‘yancin kan bana zai kasance cikin sauki, inda za a fi mayar da hankali kan tunani da nazari maimakon gudanar da manyan bukukuwa.