PDP ta dakatar da ƴan takarar da su ka kalubalanci zaɓen Pantami

Jam’iyyar  PDP a Jihar Gombe ta dakatar da wasu ’yan takarar gwamna biyu, Khamisu Ahmed Mailantarki da Usman Aliyu Garry, bisa zargin aikata ayyukan da suka saba wa jam’iyya.

Dakatarwar ta fito ne a cikin wata sanarwa da aka fitar  ranar Laraba, 30 ga Satumba, wacce sakataren yada labara jam’iyar PDP ta jihar Gombe, Abdulkadir Ahmed Dukku, ya sanya wa hannu.

A cewar sanarwar, wannan mataki ya biyo bayan gaggawar taron hadin gwiwa na kwamitin gudanarwa na jiha da shugabannin mazabu na Dawaki da Herwagana, inda Mailantarki da Garry suka fito.

Jam’iyyar ta zargi ’yan takarar biyu da aikata manyan laifuka da kuma karya kundin tsarin mulkin jam’iyya, tana mai cewa ayyukansu na iya haifar da rabuwar kai da rikice-rikice a tsakanin mambobinta.

Dakatarwar ta zo ne kwana guda bayan jam’iyyar ta gudanar da sabon zaben fidda gwani na gwamna a jihar, bayan hukuncin jotun tarayya da ya soke zaben da aka yi a baya tare da umartar a sake gudanar da shi.

Kafin sake zaben, PDP ta tantance Mailantarki, Garry da tsohon Ministan Sadarwa da Tattalin Arzikin Intanet, Farfesa Isa Ali Pantami, domin shiga zaben.

Jam’iyyar ta ce musamman kalaman Mailantarki a wata hira da ya yi da kafar yada labarai, inda ya bayyana cewa ya lashe zaben fidda gwani na 29 ga Satumba, abin da ta kira da rashin karɓuwa.

Ta ce ’yan takarar biyu sun amince da shiga zaben amma daga baya suka shiga ayyuka da suka saba wa dokokin jam’iyya.

“Jam’iyyar ta dakatar da ’yan takarar biyu na tsawon wata ɗaya tare da mika lamarin ga kwamitin ladabtarwa na jam’iyya,” in ji sanarwar.

Dakatarwar ta biyo bayan ayyana Pantami a matsayin wanda ya lashe zaben da aka sake gudanarwa a ranar Talata, inda ya samu kuri’u 2,054, Mailantarki ya samu 389, yayin da Garry ya samu 112.

Mailantarki ya ki amincewa da sakamakon, inda ya kalubalanci cancantar Pantami na shiga zaben, yana mai cewa shi ne halastaccen wanda ya lashe zaben.

Ya kuma nuna cewa zai bi lamarin ta hanyar kotu.