NDLEA ta lalata gonakin tabar wiwi guda 5 a jihar Edo

Hukumar Yaki da Hana Sha da Fataucin Miyagun Kwayoyi ta Ƙasa (NDLEA), reshen Jihar Edo, ta lalata gonakin tabar wiwi guda biyar tare da kama mutane uku da ake zargin masu safarar miyagun kwayoyi ne a jihar. 

Hukumar ta kuma kwato wasu nau’o’in kwayoyi masu illa ga kwakwalwa, ciki har da tramadol, maganin tari mai ɗauke da  codeine da diazepam, tare da asirin sihiri da wuƙaƙe a lokacin wani samame  da ta kai.

Kwamandan NDLEA na jihar, Mitchell Ofoyeju ne  ya bayyana cewa gonakin da aka lalata sun kai girman hekta 2.269668 ,tare da shukar  tabar wiwi mai nauyin 5,674.17kg. 

Ya ce gonaki biyu da suka kai hekta 0.928744  an same su ne a Monday Camp dake Dajin Usan a ƙaramar hukumar Ovia South West. 

Haka kuma, gonaki biyu da suka kai hekta 1.004278  sun kasance a Dajin Igwe-Oke, a ƙaramar hukumar Owan East, yayin da aka gano gona guda ɗaya mai girman hekta 0.336646  a Dajin  Ogboha a karamar hukumar Owan West. 

A lokacin samamen da aka kai Ogboha Forest a Owan West, an kama Sunday Segun, mai shekaru 39, a wurin.

Har ila yau rundunar ta samu nasarar kama kuma, Jamie Zubaru a Auchi da mota dake ɗauke da miyagun kwayoyi.