Peter Obi Ya Kalubalanci ’Yan Najeriya Su Tono Duk Wani Laifi A Tarihinsa

Ɗan takarar shugaban ƙasa na jam’iyyar Nigeria Democratic Congress (NDC), Peter Obi, ya ƙalubalanci ’yan Najeriya da su bayyana duk wani laifi ko rashin gaskiya da suka san ya aikata a baya.

Obi ya yi wannan ƙalubalen ne ranar Alhamis a wani taron tattaunawa da masu zaɓe a Port Harcourt, Jihar Rivers, inda ya amsa tambayoyi kan zaɓen shugaban ƙasa na 2027.

Tsohon gwamnan Jihar Anambra ya ce shi da abokin takararsa, Rabiu Kwankwaso, sun gabatar da cikakkun bayanan rayuwarsu domin jama’a su samu damar tantance su.

Da yake magana kan wata shari’a da ya shigar kan Kenneth Okonkwo, tsohon mai magana da yawunsa a zaɓen 2023, Obi ya ce ya nemi kotu ta tilasta masa bayyana wasu bayanai da ya ce zai iya girgiza jama’a.


Obi ya kuma ƙalubalanci duk wani mutum da ke da hujjar cewa shi ko Kwankwaso sun aikata wani laifi da ya fito fili ya bayyana hakan.

Ya kuma ce ya kamata a rika auna shugabannin siyasa bisa sahihancin tsarin da ya kai su kan madafun iko.