’Yan Najeriya Sun Koka Kan Yawaitar Kayayyakin Jabu A Kasuwa

’Yan Najeriya sun nuna damuwa kan yadda kayayyakin jabu da marasa inganci ke yawaita a kasuwanni, tare da yin kira ga hukumomin da ke kula da ingancin kayayyaki da su ƙara tsaurara matakan sa ido da hukunci.

Wannan na zuwa ne bayan wasu bidiyoyi da hotuna da aka wallafa a kafafen sada zumunta, inda aka kwatanta wasu kayayyaki da ake zargin na jabu da na asali, ciki har da man goge baki, yoghurt, magunguna, man ja, ruwan sha da sauran kayan masarufi.

Likita Dr Rotimi Adesanya ya yi gargadin cewa amfani da kayayyakin jabu na iya haifar da matsalolin lafiya kamar lalacewar ƙoda, hanta da zuciya, da kuma wasu matsalolin haihuwa.

Adesanya ya bukaci Hukumar Kula da Ingancin Abinci da Magunguna ta Ƙasa (NAFDAC) ta riƙa gudanar da bincike a kai a kai kan kayayyakin da ake sayarwa a kasuwanni.

Shi ma tsohon Shugaban Ƙungiyar Likitoci ta Najeriya (NMA), reshen Jihar Legas, Dr Saheed Babajide, ya ce rashin isasshen aiwatar da doka na daga cikin abubuwan da ke bai wa masu safarar magungunan jabu damar ci gaba da harkokinsu.

A cewarsa, gwamnati na bukatar ta ƙara wa hukumomin kamar NAFDAC da Standards Organisation of Nigeria (SON) ƙarfi tare da tabbatar da cewa masu safarar kayayyakin jabu sun fuskanci hukunci mai tsauri.

Rahoton ya kuma bayyana cewa NAFDAC ta kwace miliyoyin magungunan zazzabin cizon sauro da wasu kayayyakin magunguna na jabu da marasa rajista a wasu samame da ta gudanar.