Farashin Diesel Ya Haura ₦2,000 Kan Lita A Abuja

Farashin diesel ya haura ₦2,000 kan lita a Abuja da wasu yankunan Najeriya, lamarin da ya ƙara matsin tattalin arziki ga masu amfani da man.

Wani bincike ya nuna cewa farashin diesel ya tashi zuwa tsakanin ₦2,000 da ₦2,020 kan lita a wasu gidajen mai a Abuja da kewaye, daga ₦1,700 zuwa ₦1,800 da ake sayar da shi a baya.

Hakan na nufin an samu ƙarin farashi tsakanin ₦220 da ₦300 kan kowace lita, gwargwadon gidan mai da wurin da ake sayar da man.

Ƙarin farashin ya biyo bayan tashin farashin diesel daga masu mallakar wuraren ajiyar mai zuwa ₦1,900 kan lita.

Rahoton ya ce wasu masu ajiye man sun riga sun fara amfani da sabon farashin, yayin da Dangote Refinery ita ma ta ƙara farashin diesel ɗinta da ₦100, inda ya kai ₦1,850 kan lita.

Ƙarin farashin ya zo ne a daidai lokacin da farashin ɗanyen mai a kasuwar duniya ya kai sama da dala 95 kan ganga, ko da yake farashin Brent da WTI sun ɗan sauko zuwa dala 94.74 da dala 90.34 kan ganga, bi da bi, a lokacin da aka fitar da rahoton.