Yan bindiga a jihar Kogi sun kashe shugaban jam’iyar APC

Yan bindiga sun kashe, Ishaq Yunusa shugaban jam’iyar APC na ƙaramar hukumar Dekina dake jihar Kogi tare da yin garkuwa da wani da su ke tafiya tare a cikin mota.

Lamarin ya faru ne a ranar Alhamis akan babbar hanyar Itobe-Ochadamu wajejen yankin Ojuwo Olijo a karamar hukumar Ofu ta jihar.

Afusat Saliu mai magana da yawun rundunar yan sandan jihar Kogi ta tabbatar da faruwar lamarin a cikin wata sanarwa da ta rabawa yan jaridu ranar Juma’a a Lokoja babban birnin jihar.

Afusat ta ce an kai farmakin ne  da misalin karfe biyar na yamma lokacin da yan bindiga suka fito daga cikin  daji kana suka buɗe wuta kan ayarin motocin dake tafiya akan titin.

Ta ce an ga wata mota ƙirar Toyota Corolla launin shuɗi mai ɗauke da namba GWA 636 CH a gefen titi.

“An gano direban motar  Hon Ishaq Yunusa ya mutu a ciki a yayin da aka ɗauke ɗaya mutumin dake cikin motar ya zuwa cikin daji,” a cewar sanarwar.

Ta kara da cewa yan sanda tare da haɗin gwiwar jami’an tsaro na cigaba da zafafa sintiri a yankin.