Dakarun rundunar sojan Najeriya sun samu nasarar kama gawurtaccen ɗan fashin daji da ake kira da Kachalla Halilu a wani samame da suka kai kasuwar mako ta garin Shinkafi dake jihar Zamfara.
Kafar Zagazola Makama dake wallafa bayanai kan sha’anin tsaro a Najeriya ta bayyana cewa dakarun sun samu nasarar kama shi ne biyo wasu kwararan bayanan sirri da su ka samu da ke cewa an ga wanda ake zargin a Kasuwar.
Samun bayanan ke da wuya dakarun suka tattaru suka garzaya wurin inda suka kama Halilu ba tare da ya nuna turjiya ba.
Kayan da aka samu a tare da shi sun haɗa da babur, wayar hannu, hula da kuma maganin dabbobi.
A cewar kafar Zagazola tuni aka miƙa shi ga jami’an leken asiri na rundunar sojan Najeriya inda za su cigaba da gudanar da bincike.
Kamun nasa wani ɓangare ne na kokarin da jami’an tsaro ke cigaba da yi na kawo ƙarshen ayyukan yan ta’adda a jihar ta Zamfara
