Ƴan Bindiga Sun Hallaka Jami’in Tsaro, Sun Sace Mutane A Zamfara



Wasu ’yan bindiga sun kashe wani jami’in tsaro tare da yin garkuwa da wasu ’yan uwa da kuma baƙonsu a wani hari da suka kai gidan wani ɗan kasuwa, Alhaji Babangida Sama’ila, da ke Sabuwar Kaura, ƙaramar hukumar Kaura Namoda a jihar Zamfara.

Maharan sun kai harin ne a ranar Litinin, inda suka yi kusan awa guda suna gudanar da farmakin. Daga cikin waɗanda aka sace akwai ’yan mata 3, mahaifiyarsu da kuma wasu yara maza 2. Sai dai daga baya an samu labarin cewa an saki mahaifiyar.

Wani mazaunin yankin ya shaida wa jaridar Daily Trust cewa yaran da aka sace suna da shekaru tsakanin 14 zuwa 16, yayin da baƙon da ke gidan yake da kusan shekaru 15 zuwa 16.

Ya ce maharan sun kashe jami’in tsaron ne lokacin da ya yi ƙoƙarin hana su shiga gidan. Daga bisani, sun yi amfani da wani gini na wucin gadi wajen hawa katangar gidan, yayin da Alhaji Sama’ila da ɗaya daga cikin ’ya’yansa suka tsere ta hanyar tsallake katangar.

Mazaunin ya nuna damuwa kan yadda maharan suka shafe kusan awa guda suna gudanar da harin ba tare da jami’an tsaro sun kai musu ɗauki cikin gaggawa ba, duk da cewa gidan yana kusa da Babban Asibitin Kaura Namoda.

Ya yi zargin cewa harbe-harben gargadi da sojojin da ke kusa da gidan shugaban Kwalejin Fasaha ta Tarayya da kuma jami’an tsaron sa-kai suka yi ne suka kawo cikas ga aikin maharan.

Adadin Waɗanda Aka Kashe A Harin Masallaci Ya Kai 7

A wani labarin makamancin haka, adadin mutanen da aka kashe a harin da ’yan bindiga suka kai kan masu ibada a wani masallaci da ke Sabuwar Kaura Low-Cost a ranar Lahadi ya kai 7, yayin da aka yi garkuwa da wasu mutane 15.

Harin ya faru ne jim kaɗan bayan kammala sallar asuba ta jam’i, lokacin da masu ibada ke fitowa daga masallacin.

Daga cikin waɗanda suka mutu har da Nasiru Sani Abubakar, wanda ke aiki a matsayin hadimi ga Gwamna Dauda Lawal. Sauran waɗanda aka kashe sun haɗa da Lauwali Abubakar, Malam Abdulrazak, Malam Abubakar, Malam Musa, Malam Usman da Malam Lawal Abubakar.

Wani mazaunin yankin, Mallam Yusuf Bello Kaura, ya shaida wa jaridar cewa maharan sun buɗe wa masu ibadar wuta yayin da suke barin masallacin bayan kammala sallah.

Ya ce harin ya jefa al’ummar yankin cikin alhini, yana mai cewa duk da hare-haren da aka saba fuskanta a yankin, ba su taɓa ganin irin wannan mummunan lamari ba.

Wani mazaunin, Auwalu Ibrahim, ya yi zargin cewa maharan sun yi kwanton ɓauna ne a kusa da masallacin kafin lokacin sallar. Ya kuma nuna damuwa kan yadda aka kai harin a nisan da bai kai mil 10 daga sansanin sojoji ba.

An binne gawarwakin mutum 7 ɗin da aka kashe da misalin ƙarfe 11 na safiyar Litinin. Sai dai har zuwa lokacin da aka tattara rahoton, maharan ba su tuntubi iyalan waɗanda aka yi garkuwa da su ba.

’Yan Sanda Sun Tura Jami’ai Yankin

Kwamishinan ’Yan Sandan Jihar Zamfara, Ahmad Bello, ya tabbatar da harin masallacin, amma ya bayyana adadin waɗanda suka mutu da waɗanda aka sace ya bambanta da wanda mazauna yankin suka bayar.

A cikin wata sanarwa, Bello ya ce kusan ’yan bindiga 30, waɗanda ake zargin suna biyayya ga fitaccen shugaban ’yan bindiga Bello Wakkala, wanda aka fi sani da Dan Sadiya, ne suka kai harin.

Ya ce mutum 1 ne ya mutu, yayin da aka yi garkuwa da masu ibada 4, yana mai cewa har yanzu ba a tabbatar da ainihin dalilin harin da adadin waɗanda aka sace ba.

Kwamishinan ya ƙara da cewa an tura jami’an ’yan sanda zuwa yankin domin hana sake faruwar hare-hare, sannan za a ƙara tura wasu jami’ai zuwa ƙaramar hukumar domin kare rayuka da dukiyoyin al’umma.

Hare-haren sun faru ne kwana guda bayan kisan Nasiru Sani Kaura, wani babban hadimi ga Gwamna Dauda Lawal, da wasu masu ibada 6 a harin masallacin. Lamarin ya jawo fushin jama’a, inda wasu mazauna yankin suka yi wa gwamnan ihu yayin sallar jana’izar da aka gudanar ranar Lahadi.

Loading

Signing-in 3 seconds...

Signing-up 3 seconds...