Nafiu Bala Ya Sanar Da INEC Cewa Ya Dawo Matsayinsa Na Shugaban ADC Na Ƙasa

Muhammadu SabiuNews2 minutes ago



Hon. Nafiu Bala Gombe ya sanar da Hukumar Zaɓe Mai Zaman Kanta ta Ƙasa (INEC) cewa ya koma bakin aikinsa a matsayin shugaban jam’iyyar African Democratic Congress (ADC) na ƙasa, bisa hukuncin kotu da aka yanke a ranar 5 ga Nuwamba, 2026.

A cikin wasiƙar da ya aika wa hukumar a ranar 16 ga Nuwamba, 2026, wadda INEC ta karɓa a wannan rana, Bala Gombe ya bayyana cewa ya koma ofis ne bisa hukuncin da Mai Shari’a Peter Lifu na Babbar Kotun Tarayya da ke Abuja ya yanke.

Wasiƙar mai lamba ADC/NHQ/CH/2026/001 ta yi nuni da ƙarar da ke ƙarƙashin lamba FHC/ABJ/CS/1819/2025, wadda Nafiu Bala Gombe ya shigar a kan jam’iyyar ADC da wasu mutane 4.

A cewar wasiƙar, kotun ta tabbatar da matsayinsa na shugaban jam’iyyar na ƙasa, lamarin da ya sa ya koma bakin aiki nan take.

Bala Gombe ya buƙaci INEC ta amince da komawarsa tare da saka shi a matsayin shugaban ADC na ƙasa a dukkan wasiƙu da takardun da suka shafi jam’iyyar, sannan ta sabunta bayananta da shafin yanar gizonta.

Ya kuma haɗa da sahihin kwafin hukuncin kotun domin hukumar ta adana tare da ɗaukar matakan da suka dace.

A wani saƙo da ya wallafa a shafinsa na Facebook bayan haka, Bala Gombe ya sake jaddada cewa ya koma kan kujerarsa, tare da umartar cewa daga yanzu duk wata wasiƙa ko sadarwa ta hukuma da ta shafi jam’iyyar ta bi ta ofishinsa.

Loading

Signing-in 3 seconds...

Signing-up 3 seconds...