Tsohon mai magana da yawun jam’iyar PDP na kasa, Olisa Metuh ya sanar da shigarsa jam’iyar APC inda ya yi zargin cewa PDP ta yi watsi da shi da dai-dai lokacin da yake fuskantar kalubale a baya.
Metuh wanda a shekaru uku da suka wuce ya sanar da cewa ya daina yin siyasa ya ayyana cewa zai koma cikin jam’iyar APC saboda yadda mambobinta suka kasance tare da shi lokacin da yake bukatar taimako.
Tsohon kakakin ya sanar da sauya shekar ta sa a wurin wani bikin taron addu’ar godiya da Allah da aka shirya masa a Abuja na cikarsa shekaru 60 a duniya.
A cikin wadanda suka halarci wurin taron sun hada da gwamnan jihar Imo, Hope Uzodinma, tsohon shugaban majalisar dattawa, Anyim Pius Anyim, tsohon gwamnan Abia, Okeazie Ikpeazu, tsohon gwamnan Ebonyi, Sam Egwu, tsohon gwamnan jihar, Imo Ikedi Ohakim da kuma Sanata Victor Umeh da Tony Nwoye.
Metuh ya ce a shirye yake ya bayar da tasa gudummawar wajen cigaban Najeriya ta hanyar jam’iyar APC.
