An ayyana ranar Litinin 1 ga watan Mayu a matsayin ranar hutu domin bikin ranar ma’aikata ta bana.
Ministan harkokin cikin gida, Rauf Aregbesola ne ya bayyana hakan a ranar Juma’a.
Aregbesola, a cikin wata sanarwa mai dauke da sa hannun babban sakataren ma’aikatar harkokin cikin gida, Shuaib Belgore, a ranar Juma’a, ya yabawa ma’aikatan Najeriya bisa kwazonsu da sadaukarwarsu.
Ya kara da cewa kokarin da ma’aikata ke yi shi ne ke da alhakin daukakar kasar da kuma mutunta Najeriya a yanzu a cikin kasashen duniya.
“Akwai mutunci a cikin aiki; dole ne mu himmatu da jajircewa kan aikin da muke yi domin yana da muhimmanci ga gina kasa,” inji shi.
