Asalin hoton, Getty Images
Koin Tottenham Hotspur Jose Mourinho na fatan sake haɗuwa da Sergio Ramos yayin da yake bin sahun tattaunawar kwantaragin ɗan wasan mai shekara 34 a Real Madrid. (Evening Standard via Mail)
AC Milan na son ɗaukar Wilfred Zaha na Crystal Palace a watan Janairu kuma tana ganin ɗan ƙasar Ivory Coast ɗin mai shekara 28 zai taimaka mata ɗaukar kofin Serie A na farko cikin shekara 10. (Sun)
Haka nan, Milan ɗin na da ƙwarin gwiwar cewa mai tsaron ragarta, Gianluigi Donnarumma mai shekara 21, zai ci gaba da zama a ƙungiyar. (Corriere Della Sera)
Ɗan wasan gaba na Atletico Madrid da Spain, Deigo Costa mai shekara 32, ya nemi ƙungiyar ta soke kwantaraginsa tare da barinta a watan Janairu. (Goal)
Sai dai Arsenal na yunƙurin ɗaukar Costa ɗin saboda tana son ƙara sayen ɗan wasan gaba. (AS via Express)
Idan ƙungiyoyin Real Madrid ko Barcelona ko Sevilla suna son sayen Diego Costa sai sun biya fan miliyan 22.7. (El Mundo)
Tsohon kocin PSG da aka kora, Thomas Tuchel, na cikin jerin waɗanda za su maye Frank Lamprad a Chelsea, wanda ake ƙara matsa wa lamba. (Bild via Eurosport)
Ana kyautata zaton ɗan wasan tsakiyar Real Madrid da Spain, Isco, zai koma gasar Premier League sama da Serie A, yayin da Arsenal da Everton ke ƙoƙarin ɗaukarsa. (Mundo Deportivo)
