Hakkin mallakar hoto
FCBarcelona
Kyaftin din tawagar kwallon kafa ta Argentina da Barcelona, Lionel Messi ya yi bajinta da yawa a fagen taka leda a duniya da za a dade ana tunawa da shi.
Ciki har da lashe Ballon d’Or shida da karbar takalmin zinare a yawan cin kwallaye a Turai da sauransu, sai dai duk da haka akwai kalubale dake gabansa guda 10.
1. Tarihin yawan buga wa Barcelona wasanni.
Ba a dade ba Messi ya haura tarihin da Andres Iniesta ya kafa, ya koma na biyu a jeren wadanda suka yi wa Barca wasanni da dama, yanzu ya yi 692, wanda ke na daya shi ne Xavi Hernandez wanda ya buga 767.
2. Takalmin zinare na bakwai a La Liga da Turai
Messi ya lashe takalmin zinare karo na shida wajen cin kwallaye a gasar Turai, kuma a lokacin kan jagoranci zura kwallaye a raga a gasar La Liga.
3. Yawan lashe kofuna da Ryan Giggs da Vitor Baia suka yi
Idan har Barcelona za ta ci kofuna uku nan gaba, hakan zai bai wa Messi damar haura tsohon dan wasan Manchester United Ryan Giggs mai horas da tawagar Wales a tarihin da ya kafa.
Kawo yanzu ya dara tsohon golan Barcelona da kungiyar Porto Vitor Baia da kofi daya.
4. Lashe kofin Champions League biyar
Za a buga wasan karshe na Champions League a bana a filin wasa na Ataturk da ke Istanbul, idan har Barcelona ta lashe kofin shi ne karon farko da Messi zai daga a matsayin kyaftin, kuma na biyar jumulla.
5. Dan Barcelona da ya fi yawan buga El Clasico
Xavi Hernandez ne ke rike da tarhin yawan buga wa Barca wasan hamayya na El Clasico, sai dai Messi wanda ya yi karawa 41, idan ya buga wanda za a yi ranar 26 ga watan Oktoba zai yi kan-kan-kan da na Hernandez.
‘Yan wasan Real Madrid uku sun buga El Clasico 42 daidai da na Xavi, inda Sergio Ramos har yanzu ke buga wasannin daga cikin sauran.
Hakkin mallakar hoto
Getty Images
6. Cin kwallo daga bugun tazara sau 50
Lionel Messi ya kusan cin kwallo na 50 a bugun tazara, kawo yanzu yana da 43 a Barcelona da guda shida da ya ci wa Argentina.
7. Cin kwallo uku rigis a bugun tazara
Messi ya ci kwallo biyu a bugun tazara a karo da dama, idan har zai samu damar cin uku a wasa guda, hakan zai kara daga darajarsa a tamaula.
8. Cin kwallo 500 a gasar Lik
Kyaftin din Argentina ya haura 400 da ya zura a raga a bara, kawo yanzu ya ci 420 a La Liga.
Wanda ke kan gaba shi ne Josef Bican da yake da 447, sai kuma Uwe Seeler mai guda 444 a raga.
9. Doke yawan kwallon da Pele ya ci a tarihi
An ce Pele ya zura kwallo 510 zuwa 643 har da 31 da ya ci a Cosmos ta New York, Messi yana da 604 da ya ci a Barcelona kawo yanzu.
10 Cin kwallo 700
Messi ya ci kwallo 672 jumulla, guda 604 a Barcelona da 68 a tawagar Argentina, daf ya ke da ya kai 700 kenan idan yana da koshin lafiya.
