Dakarun Operation HADIN KAI da ke ƙarƙashin rundunar haɗin gwiwa ta Arewa maso Gabas sun kuɓutar da mutane sama da arba’in da bakwai daga hannun mayaƙan ISWAP a jihar Borno.
An gudanar da aikin ceto ne a yankin Kangarwa da ke ƙaramar hukumar Kukawa bayan dakarun sun ƙara kai hare-hare kan maɓoyar ’yan ta’adda a yankin Tafkin Chadi.
Mai magana da yawun Operation HADIN KAI, Kyaftin Mohammed Goni, ya ce hare-haren ƙasa da sama sun tilasta mayaƙan tserewa daga sansanoninsu, lamarin da ya bai wa waɗanda aka tsare damar tserewa.
Rundunar ta bayyana cewa galibin waɗanda aka kuɓutar mata ne da yara, kuma an kai su wani wuri mai tsaro domin kula da lafiyarsu tare da ba su agajin jin ƙai.
Haka kuma jami’ai sun ce ana shirye-shiryen haɗa waɗanda aka ceto da iyalansu da al’ummominsu.
Operation HADIN KAI ta sake jaddada aniyarta ta ci gaba da kai hare-hare kan ’yan ta’adda har sai an dawo da zaman lafiya a yankin Arewa maso Gabas.
Dakarun Operation HADIN KAI Sun Kuɓutar Da Mutane 47 A Borno
