Gobara ta hallaka amarya da angonta a jihar Filato

Sulaiman SaadArewa, Hausa8 minutes ago



Wasu ma’aurata da suka yi aure kwanan nan, waɗanda aka bayyana sunayensu da Sikiru Habib da matarsa Ramlat Lawan, sun rasu sakamakon gobarar da ta tashi a gidansu da ke Anguwan Miyango, Bukuru, a ƙaramar hukumar Jos ta Kudu dake a Jihar Plateau.

Mazauna yankin da suka bayyana lamarin a matsayin abin takaici sun ce gobarar ta kama ɗakin ma’auratan ne da misalin ƙarfe 2:30 na safiyar Asabar.

Majiyar wakilin jaridar Daily Trust ta bayyana cewa gobarar ta tashi ne yayin da sabbin ma’auratan ke barci a cikin ɗakinsu.

Mazauna yankin sun ce akwai yiwuwar gobarar ta samo asali ne daga wutar lantarki mai matsanancin ƙarfi, sai dai babu wata sanarwa ta hukuma da ta tabbatar da hakan.

Makwabcin mamatan, Injiniya Lawal Suleiman, ya bayyana lamarin a matsayin abin firgita, yana mai cewa angon ya rasu ne a ranar Lahadi, yayin da amaryar ta rasu a ranar Litinin bayan an kwantar da su a asibiti.


“Lamarin ya ƙara tsananta ne lokacin da ƙofar ɗakin ta kasa buɗewa, wanda ya sa ma’auratan suka makale a ciki yayin da gobarar ke ƙara bazuwa.”a cewar Injiniya Lawal

Makwabta, musamman matasa, sun yi gaggawar zuwa wurin tare da ƙoƙarin ceto waɗanda abin ya rutsa da su.

“Daga baya sun samu nasarar shiga ɗakin ta taga bayan sun fasa ta, suka ciro ma’auratan kafin jami’an kashe gobara su iso domin bayar da agajin gaggawa.”


Lawal ya ƙara da cewa “Daga nan aka garzaya da waɗanda suka jikkata zuwa Asibitin Koyarwa na Jami’ar Jos (JUTH), inda aka ba su kulawar lafiya.”

Loading

Signing-in 3 seconds...

Signing-up 3 seconds...