An dakatar da wani limami bayan ya jagoranci su Atiku sallah

Tsohon Mataimakin Shugaban Kasa kuma ɗan takarar shugaban ƙasa na jam’iyya ADC, Alhaji Atiku Abubakar, ya zargi wasu ’yan siyasa, musamman wasu gwamnoni, da gallaza wa mutanen da ke hulɗa da shi.

Atiku ya yi zargin cewa an dakatar da wani Limami bayan ya jagoranci sallar jam’i da ya halarta.

Atiku ya bayyana haka ne a ranar Asabar yayin wata ziyarar  girmamawa da ya kai wa Sarkin Bauchi, Alhaji Rilwanu Suleiman Adamu, a yayin yaƙin neman zaɓensa da yake yi a jihar.

Ya ce ya je fadar Sarkin ne domin nuna girmamawa da karramawa ga masarautun gargajiya.

“Mai Martaba, a gare ni wannan gida na ne. Na zo fadar ne domin na gaishe ku tare da nuna girmamawa da karramawa ga Babanmu.”

Atiku ya tambayi dalilin da ya sa ’yan siyasa da dama ke komawa ga sarakunan gargajiya domin neman sarautun girmamawa bayan sun bar muƙamansu, yana mai cewa hakan yana nuna muhimmancin sarautun gargajiya ga al’umma.

“Ina son in yi tambaya: Me ya sa ’yan siyasa ke komawa ga sarakunan gargajiya domin neman sarautu bayan sun gama aikinsu a gwamnati? Ko kai shugaban ƙasa ne, ko gwamna, ko sanata, ko minista, da zarar ka kammala wa’adinka, sai ka dawo fada domin karɓar sarautar gargajiya, domin nan ne asalinmu kuma makomarmu.

“Muna matuƙar godiya da wannan damar da aka ba mu don mu ziyarci Mai Martaba tare da nuna girmamawarmu gare al’umma a Bauchi,” in ji shi.

Atiku ya yabawa Gwamnan Jihar Bauchi, Bala Mohammed, saboda ba shi damar ziyartar masarautun jihar ba tare da wani cikas ba.

Ya ce: “Ina so na yi godiya ta musamman ga Gwamnan Jihar Bauchi saboda karamcin da ya nuna mana. A wurare da dama da muke ziyarta, ba a barin mu mu gana da sarakunan gargajiya ko mu je mu gaishe su, maimakon haka sai a hana mu.

“Lamarin ya kai wani matsayi da har wani limami a masallacin da na yi sallah aka dakatar da shi saboda na yi sallah a can. Wannan ya sa na tambayi kaina: A tarihin Arewacin Najeriya, na san cewa limami yana ƙarƙashin ikon babban mai sarautar gargajiya, wato Sarki, ba gwamna ba. Domin gwamna zai kammala wa’adinsa ya bar ofis, amma Sarki yana ci gaba da riƙe da matsayinsa.”