Masu Zanga-Zanga Sun Yayyaga Fastocin Tinubu A Abuja Tare Da Kwarmara “Tinubu Must Go”

Wasu fusatattun masu zanga-zanga sun fito kan titunan yankin Area 1 da ke Abuja a ranar Juma’a, inda suka cire fastoci da manyan allunan tallata Shugaba Bola Tinubu tare da yayyaga su.

Wani bidiyo da ya yadu a kafafen sada zumunta ya nuna masu zanga-zangar suna cire fastocin daga bango, shaguna da sandunan talla, sannan suna taka su tare da rera taken “Tinubu Must Go” (Tinubu ya tafi).

Rahoton ya ce mafi yawancin masu zanga-zangar matasa ne, wadanda suka rika zagaya yankin tare da yayyaga manyan allunan tallan shugaban kasar.

Wasu daga cikinsu sun kuma bayyana damuwarsu kan tsadar rayuwa, yunwa da matsalar tsaro da ke addabar kasar.

Sai dai har yanzu ba a bayyana hakikanin dalilin da ya haddasa zanga-zangar a Area 1, daya daga cikin manyan cibiyoyin kasuwanci na Babban Birnin Tarayya ba.

Lamarin ya faru ne a daidai lokacin da ake ci gaba da yada wasu bidiyoyi da ke nuna matasa suna ruguza fastoci da allunan tallata Tinubu a sassan kasar.

Haka kuma, zanga-zangar ta biyo bayan gargadin da Sufeto-Janar na ’Yan Sanda ya yi kwanaki kadan da suka gabata kan cewa lalata ko cire kayan yakin neman zaben siyasa ba bisa ka’ida ba laifi ne da doka za ta iya hukuntawa.