Mutum guda ya jikkata bayan da wani ginin bene mai hawa biyar ya ruguzo a Abuja

Ma’aikaci ɗaya ya samu ƙananan raunuka bayan rushewar wani gini mai hawa biyar da ake ginawa a titin Durban, dake  Wuse II, a babban birnin tarayya Abuja, ranar Asabar

A cikin wata sanarwa da ta fitar ranar Asabar, Hukumar Ba da Agajin Gaggawa ta Kasa (NEMA) ta hannun sashen yaɗa labarai na ofishinta na Abuja , ta ce an kai ma’aikacin da ya jikkata wani asibiti da ke kusa domin samun kulawar likitoci.

Hukumar ta ce ta samu rahoton rushewar ginin kuma nan take ta ɗauki matakin gaggawa.

“Ofishin ya samu labarin faruwar lamarin da misalin ƙarfe 6:30 na yamma kuma nan take ya tuntubi hukumomin da abin ya shafa, ciki har da Hukumar Kashe Gobara ta FCT.” a cewar sanarwar

“An tura tawagar motar ɗaukar marasa lafiya cikin gaggawa  domin jagorantar ayyukan bincike da ceto a wurin da abin ya faru.

“Binciken da aka gudanar a wurin ya nuna cewa lamarin bai yi muni ba, kuma ya shafi wani gini mai hawa biyar da ake ginawa wanda wani ɓangare na shi ya rushe.”

“Ba a rasa rai ko guda ba. Sai dai ma’aikaci ɗaya ya samu ƙananan raunuka, kuma an kai shi wani asibiti da ke kusa domin kula da lafiyarsa.”

Wannan lamari ya na zuwa ne yayin da ake ci gaba da samun yawaitar rushewar gine-gine a Abuja cikin watannin baya-bayan nan.

A watan Satumba, wani gini mai hawa uku a Wuse Zone 4 ya rushe sa’o’i kaɗan bayan mazaunan cikinsa sun karɓi takardar umarnin ficewa daga Hukumar Gudanar da Babban Birnin Tarayya (FCTA).

Sashen kula da gine-gine na FCTA ya bayyana cewa ginin ya nuna alamun matsala tun kafin rushewar sa. Ba a samu asarar rai ba a wannan lamarin.

Haka kuma, a watan Mayu, aƙalla mutane biyar sun rasa rayukansu yayin da wasu goma suka jikkata bayan rushewar wani gini mai hawa uku da ake ginawa a yankin Durumi 3, kusa da kasuwar Gudu a Abuja.

Bayan samun wannan lamari, ministan babban birnin  tarayya, Nyesom Wike, ya ba da umarnin gudanar da cikakken bincike kan abin da ya faru.