Mutane tara sun mutu, biyu sun jikkata a wani hatsarin mota a hanyar Abuja-Lokoja

Mutane tara sun rasu yayin da wasu biyu suka jikkata sakamakon wani hatsarin mota da ya afku a ƙauyen Piri da ke kan babbar hanyar Abuja zuwa Lokoja.

Wani  mutum mai suna Samson Yakubu da ya gane ma idonsa abun da ya faru ya bayyana cewa hatsarin ya shafi wata babbar mota tirela kirar Howo mai lambar rijista FKY 922 XB, kuma ya faru da misalin ƙarfe 5:37 na safiyar jiya.

Ya ce motar, wadda ke ɗauke da tayals din gini, tana kan hanyarta daga daga garin Ajaokuta na jihar Kogi zuwa Kano lokacin da direban ya rasa iko da ita sakamakon gajiya, lamarin da ya sa ta faɗa cikin rami.

A cewarsa, mutane 11 ne ke zaune a saman kayan da motar ke ɗauke da su. Tara daga cikinsu sun makale a ƙarƙashin kayan kuma suka mutu bayan motar ta kife cikin ramin, yayin da jami’an Hukumar Kiyaye Aukuwar Hadurra ta Ƙasa (FRSC) suka ceto mutum biyu da suka tsira tare inda su ka kai su asibitin gwamnati na Kwali domin samun kulawar likitoci.

Yakubu ya ƙara da cewa wasu mazauna ƙauyen sun haɗa kai da jami’an FRSC wajen ɗauke kayan kafin a samu damar fitar da gawarwakin waɗanda suka mutu.

Wani jami’in FRSC daga ofishin rundunar dake kauyen  Yangoji, wanda ya shiga aikin ceto, ya tabbatar da faruwar lamarin, yana mai cewa dukkan waɗanda suka rasu maza ne.

Jami’in ya danganta hatsarin da gajiya da kuma karya dokokin iyakar gudu, yana mai ƙara da cewa an kai gawarwakin zuwa ɗakin adana gawa na asibitin gwamnati na Kwali, yayin da waɗanda suka jikkata ke karɓar magani a asibitin.

Kwamandan FRSC na babban birnin tarayya (FCT), Tijjani Iliyasu, shi ma ya tabbatar da hatsarin, amma ya ce har yanzu yana jiran cikakken rahoto daga rundunar Yangoji.

Ya nuna damuwarsa kan yadda wasu fasinjoji ke yin tafiya a saman kayan da aka ɗora a manyan motoci, yana mai gargadin cewa hakan na jefa rayuwarsu cikin babban haɗari.

Iliyasu ya ce FRSC ta dade tana wayar da kan direbobin manyan motoci game da haɗarin ɗaukar fasinjoji a saman kaya yayin tafiye-tafiye masu nisa, kuma tana hukunta duk direban da aka kama yana karya dokar.

Har ila yau, kwamandan ya bayyana cewa an hukunta kamfanin da ke aikin faɗaɗa wani ɓangare na babbar hanyar Abuja zuwa Lokoja saboda zargin rashin sanya isassun alamun gargaɗin zirga-zirga a yankin da ake aikin hanya.