’Yan Bindiga Sun HaIIaka Shugaban Mafarauta A Taraba

Wasu da ake zargin ’yan bindiga ne sun kashe Shuayibu Danladi Ciroma, shugaban mafarauta a al’ummar Andamin da ke Ƙaramar Hukumar Karim-Lamido a Jihar Taraba.

Marigayin, wanda kuma mamba ne a rundunar masu gadin dazuzzuka, ya gamu da ajalinsa ne yayin da yake cikin tawagar jami’an tsaro da mafarauta da suka nufi yankin domin dakile wani harin da ake zargin ’yan bindigar na shirin kai wa al’ummar.

A cewar wata sanarwa da shugaban al’ummar Andamin, Tanko Bobbo Andamin, ya fitar ranar 13 ga Oktoba, lamarin ya faru ne a yammacin Litinin bayan jami’an tsaro da mafarauta sun samu bayanan sirri game da shirin kai harin.

Sanarwar ta ce tawagar sojoji da mafarauta ta nufi yankin domin hana harin, amma ta ci karo da wasu ɗauke da makamai, lamarin da ya haifar da musayar wuta. A yayin arangamar, an harbi Ciroma a ƙafarsa, kuma rahoton ya ce ya rasa jini mai yawa kafin ya mutu.

Bayan arangamar, sauran mambobin tawagar sun koma sansaninsu, amma daga baya suka lura cewa Ciroma ba ya tare da su. An sake tura tawagar bincike da sanyin safiyar washegari, inda aka gano gawarsa a wurin da aka yi artabun.

Da yake alhinin rasuwarsa, Tanko Bobbo Andamin ya bayyana marigayin a matsayin mutumin da ya sadaukar da rayuwarsa wajen kare al’ummarsa, ƙasarsu da sauran mutane. Ya kuma miƙa saƙon ta’aziyya ga iyalansa, al’ummar Andamin da sauran mafarauta.

Shugaban al’ummar ya yi kira ga gwamnatin Jihar Taraba da hukumomin tsaro da na tattara bayanan sirri da su ƙara ƙaimi wajen magance matsalar tsaro a yankin.

Ya bayyana damuwa kan yadda rashin tsaro ke hana mazauna yankin zuwa gonakinsu, halartar kasuwannin al’ummomin da ke makwabtaka da su da kuma gudanar da harkokin kasuwanci cikin kwanciyar hankali. A cewarsa, lamarin na ƙara ta’azzara talauci da yunwa a tsakanin mazauna yankin.

Ya kuma yi kira da a ɗauki matakan tsaro na gaggawa da haɗin gwiwa domin kare rayuka da dukiyoyi, dawo da zaman lafiya da kuma ƙarfafa amincewar jama’a ga hukumomin tsaro.

Da aka tuntubi mai magana da yawun rundunar ’yan sandan jihar, Victor Mshelizah, ya ce matsalar sadarwa ta hana shi samun jami’in ’yan sanda na sashen yankin domin tabbatar da cikakken bayani kan lamarin. Sai dai ya yi alƙawarin tuntubar manema labarai da zarar ya samu damar magana da jami’in.