Ƴan Sanda Sun Kama Mutane 12 Kan Sace-Sace A Kaduna

Rundunar ’Yan Sandan Jihar Kaduna ta kama mutane 12 da ake zargi da hannu a ayyukan sace mutane, ciki har da waɗanda ake zargi da garkuwa da mutane guda takwas da masu kai musu bayanan sirri guda huɗu.

Rundunar ta kuma kwato bindigogin AK-47 yayin wasu samamen tsaro da ta gudanar a yankunan Millennium City da Maraban Rido domin yaƙi da sace-sace da sauran laifuffuka.

Mai magana da yawun rundunar, DSP Mansir Hassan, ne ya bayyana hakan a wata sanarwa da ya fitar ranar Litinin. Ya ce ana gudanar da ayyukan ne tare da haɗin gwiwar sauran hukumomin tsaro ta hanyar binciken yankuna, samamen kai-tsaye da sintiri.

Waɗanda ake zargi da garkuwa da mutane sun haɗa da Dauda Murna, Usman Abdullahi, Abubakar Sulaiman, Saleh Abdullahi, Usman Muhammed, Mathias Moses, Makama John da Tafarki Audu.

Sauran mutane huɗu da ake zargi da kai wa masu garkuwa da mutane bayanan sirri su ne Shuaibu Sabiu, Audu Makama, Simon Moses da Amadu Mathew.

Hassan ya ce binciken farko ya nuna cewa biyu daga cikin waɗanda aka kama sun amsa zargin yaɗa bayanan ayyukan ’yan sanda ga masu aikata laifuffuka, lamarin da ya kawo cikas ga ƙoƙarin tabbatar da tsaro tare da jefa jami’an tsaro da mazauna yankin cikin haɗari.

Sai dai rundunar ba ta bayyana sunayen waɗannan mutane biyu ba, kuma ba ta yi ƙarin bayani kan bindigogin da aka kwato ba.

Rundunar ta ce tana ci gaba da bincike domin gano cikakken irin rawar da waɗanda ake zargin suka taka, gano sauran masu hannu a lamarin da kuma gurfanar da duk waɗanda aka samu da alaƙa da laifuffukan a gaban shari’a.

A wani mataki na ƙarfafa tsaro, Gwamnatin Jihar Kaduna ta bai wa rundunar ƙarin motocin sulke guda uku, wato Armoured Personnel Carriers (APCs), domin taimaka wa ayyukan tsaro a Millennium City da yankunan da ke kewaye.

Sanarwar ta ce gwamnatin ta amince da tura motocin ne sakamakon ƙalubalen tsaro da ake fuskanta a yankin.

Haka kuma, tawagar gwamnati ƙarƙashin jagorancin Shugaban Ma’aikatan Gwamnan Kaduna, Malam Sani Kila, ta gana da sarakunan gargajiya, mazauna yankin da sauran masu ruwa da tsaki ranar 10 ga Oktoba domin tattauna hanyoyin magance matsalar garkuwa da mutane.

A yayin taron, Kila ya jaddada muhimmancin haɗin gwiwar al’umma da jami’an tsaro, inda ya buƙaci mazauna yankin, shugabannin al’umma, masu gidaje da ƙungiyoyin matasa su riƙa kai rahoton duk wanda ake zargi da taimaka wa masu aikata laifuffuka.

Kwamishinan ’Yan Sandan Jihar Kaduna, CP Muhammad Rabiu, ya kuma ba da umarnin tura ƙarin jami’an tsaro na musamman, motocin aiki da sauran kayan aiki zuwa yankunan da abin ya shafa domin ƙarfafa sintiri, gaggauta kai ɗauki da kuma hana sake aukuwar laifuffuka.

Rundunar ta buƙaci jama’a su kwantar da hankalinsu, su kasance cikin shiri tare da kai rahoton duk wani motsi ko aiki da suke zargi ga ofishin ’yan sanda mafi kusa. Ta kuma tabbatar da cewa za ta ci gaba da gudanar da samame domin tarwatsa hanyoyin sadarwar masu laifi da taimakawa wajen ceto mutanen da aka sace.