Ƴan Sandan Indiya Sun Kama Dan Najeriya Kan Zargin Safarar Hodar Ibilis

’Yan sandan Indiya sun kama wani dan Najeriya mai suna Ezeaputa Chijioke bisa zargin hannu wajen samar da hodar iblis ga masu zuwa wuraren shakatawa da bukukuwa a kasar.

Wani rahoto da jaridar The Times of India ta wallafa ranar Talata ya ce an kama Chijioke a ranar 6 ga Oktoba, tare da gram 70.5 na hodar iblis. Ana zarginsa da amfani da wasu mutane wajen rarraba miyagun kwayoyin.

Rahoton ya ce jami’an tsaro sun kama wasu mutane uku da ake zargi da safarar miyagun kwayoyi, inda aka samu jimillar gram 113 na hodar iblis da katin cire kudi na ATM a wani samame da aka gudanar a Chandigarh da yankunan da ke makwabtaka da birnin.

Binciken ya fara ne a ranar 4 ga Oktoba, lokacin da ’yan sanda suka kama Rakesh Kumar, wanda aka fi sani da Karan, a kusa da kasuwar Sector 23-C, tare da gram 22.1 na hodar iblis. Ana zargin Kumar, wanda direban haya ne, da kai wa masu shakatawa da masu halartar bukukuwa miyagun kwayoyin bisa umarnin Jaskaran Gill, wanda ake zargi da kasancewa dillalinsa.

Rahoton ya ce Gill ya ambaci Chijioke a matsayin wanda yake samo masa hodar iblis, lamarin da ya kai ga kama dan Najeriyar a ranar 6 ga Oktoba. Ana kuma zargin Chijioke da zama a Indiya ba bisa ka’ida ba, bayan da ya kasa gabatar da fasfo dinsa ga jami’an tsaro.

’Yan sanda sun kuma kwace wasu motoci uku da suka hada da Mercedes-Benz, Mitsubishi Pajero da Tata Safari daga hannun Gill, tare da katin ATM na SBI da ake zargin yana da alaka da hada-hadar kudaden safarar miyagun kwayoyi. Ana ci gaba da bincike kan lamarin.

Wannan kamen ya zo ne kasa da watanni uku bayan kama wasu ’yan Najeriya hudu a Indiya bisa zargin hannu a wata hanyar safarar miyagun kwayoyi. A lokacin, rahotanni sun ce an kwato kwayoyi da kudinsu ya kai kusan rupee crore 15, kwatankwacin naira biliyan 2.1.