Ƴan Bindiga Sun HaIIaka ’Yan Sintiri Uku Daga Kebbi A Hanyar Dawowa Daga Neja

An rawaito cewa ‘yan bindiga sun kashe wasu ‘yan sintiri uku daga karamar hukumar Shanga ta Jihar Kebbi yayin da suke kan hanyar dawowa daga Agwara ta Jihar Neja.

Rahoton lamarin ya fito ne a ranar Laraba daga Bakatsine, wani mai bayar da rahotannin rikice-rikice a yankin Arewa maso Yamma, ta wani sako da ya wallafa a shafinsa na X.

An bayyana wadanda aka kashe da sunayensu a matsayin Abubakar Mai Nera, kwamandan ‘yan sintirin Saminaka; Tanko Sarki da Amadu Saminaka, wadanda dukkaninsu suka fito daga al’ummomin Saminaka da Bakinturu.

A cewar majiyoyin yankin da Bakatsine ya ambata, an kai harin ne a yankunan Kasabo, Binuwa da Mago, da ke ketare Kogin Kwara a kan iyakar Kebbi da Neja.

An kuma rawaito cewa maharan sun kona wadanda suka kai wa harin bayan sun kai musu farmaki.

An ce lamarin ya faru ne ranar Juma’a, amma har zuwa ranar Laraba ba a gano gawarwakin ‘yan sintirin uku ba.

Ana ci gaba da kokarin gano inda suke, yayin da hukumomin yankin da mazauna garuruwan ke neman karin bayani kan lamarin.