AAC Ta Kai Tinubu Da Majalisar Kasa Kotu Kan Rashin Mika Mulki Ga Shettima

Jam’iyyar African Action Congress (AAC) ta kai Shugaban Kasa Bola Ahmed Tinubu da wasu manyan jami’an gwamnati kotu, tana kalubalantar yadda shugaban ya gudanar da doguwar tafiyarsa zuwa Turai ba tare da mika ikon gudanar da mulkin kasa ga Mataimakin Shugaban Kasa, Kashim Shettima, ba.

An shigar da karar a ranar Litinin, 28 ga Satumba, 2026, a Babbar Kotun Tarayya da ke Abuja, ta hannun Lauyan Kasa na AAC, Inibehe Effiong. An bayyana karar da lamba FHC/ABJ/CS/2353/2026.

Wadanda aka maka karar sun hada da Shugaba Tinubu, Babban Lauyan Tarayya kuma Ministan Shari’a, Lateef Fagbemi; Shugaban Majalisar Dattawa, Godswill Akpabio; Kakakin Majalisar Wakilai, Tajudeen Abbas; da Majalisar Kasa.

AAC na neman kotu ta fayyace ko rashin aika rubutaccen sanarwa daga shugaban kasa zuwa ga Shugaban Majalisar Dattawa da Kakakin Majalisar Wakilai kafin tafiyarsa ya saba wa tanadin Sashe na 145(1) na Kundin Tsarin Mulkin Najeriya na 1999, kamar yadda aka gyara.

Jam’iyyar ta kuma kalubalanci rashin daukar mataki daga Majalisar Kasa bayan rashin shugaban kasar ya wuce kwanaki 21, inda ta bukaci kotu ta ayyana ko ya kamata Majalisar ta dauki matakin ba Mataimakin Shugaban Kasa ikon gudanar da ayyukan shugaban a matsayin Mukaddashin Shugaban Kasa.

Tinubu ya bar Najeriya zuwa Turai a ranar 30 ga Agusta domin hutun aiki na makonni uku. Daga bisani Fadar Shugaban Kasa ta sanar da cewa an tsawaita hutun da wasu kwanaki, amma ya zuwa ranar 28 ga Satumba bai dawo Najeriya ba.

Daga cikin bukatun AAC akwai umarnin kotu da zai hana Shugaba Tinubu da shugabannin kasa na gaba tafiya hutu ba tare da bin tanadin Sashe na 145(1) na Kundin Tsarin Mulki ba.

Har ila yau, jam’iyyar na neman kotu ta yi hukunci kan rawar da Majalisar Kasa ya kamata ta taka idan shugaban kasa ya shafe fiye da kwanaki 21 ba tare da aika sanarwar da kundin tsarin mulki ya tanada ba.

Ya zuwa lokacin da aka shigar da karar, ba a sanya ranar sauraron karar ba.