2027: Sultan Ya Gargadi ‘Yan Siyasa Kan Zagi Da Kalaman Tayar Da Hankali

Sultan na Sokoto kuma Shugaban Majalisar Koli ta Harkokin Addinin Musulunci ta Najeriya (NSCIA), Muhammad Sa’ad Abubakar, ya gargadi ‘yan siyasa da magoya bayansu kan amfani da zagi da kalaman tayar da hankali yayin da ake tunkarar babban zaben 2027.

Sultan ya ce irin wadannan kalamai na iya kara tashin hankali tare da haifar da rikici a tsakanin al’umma.

Ya yi wannan gargadin ne ranar Litinin lokacin da dan takarar shugaban kasa na jam’iyyar Nigerian Democratic Congress (NDC), Peter Obi, da abokin takararsa, Rabiu Kwankwaso, suka kai masa ziyara a fadarsa da ke Sokoto.

Obi da Kwankwaso sun samu rakiyar dan takarar gwamnan jihar Sokoto na jam’iyyar, Shamsu Haido, da sauran magoya bayan NDC.

A cikin wata sanarwa da Shugaban Tawagar Yada Labaran Sultan, Prince Bashir Adefaka, ya fitar, Sarkin ya bukaci ‘yan siyasa da magoya bayansu daga jam’iyyu daban-daban da su guji amfani da kalaman batanci, zagi da maganganun tayar da hankali.

Sanarwar ta ce irin wannan hali na iya kara tashin hankali tare da janyo tashin hankali a tsakanin al’umma.

Sultan ya ce ‘yan siyasa suna da ‘yancin tsarin mulki da dimokuradiyya na gabatar da manufofinsu, shirye-shiryensu da ra’ayoyinsu ga masu kada kuri’a domin neman goyon bayansu.

Sai dai ya bukace su da su yi amfani da wannan ‘yanci cikin mutunci da bin tanadin doka, tare da mutunta sauran ‘yan takara, jam’iyyu da ‘yan Najeriya masu ra’ayoyin siyasa daban-daban.

Ya kuma jaddada bukatar masu ruwa da tsaki a siyasa su fifita muradun Najeriya da zaman lafiyar kasar a kan bambance-bambancen siyasarsu.

Sultan ya ce mukaman siyasa na wucin gadi ne, yayin da hadin kan kasa, zaman lafiya da kwanciyar hankali suke da muhimmanci wajen ci gaban Najeriya.

Haka kuma, ya bukaci shugabannin siyasa, musamman masu neman mukaman zabe, da su zama abin koyi ta hanyar nuna irin halayen da suke son magoya bayansu su bi.

Ya yi kira ga ‘yan siyasa da su tabbatar da cewa yakin neman zabe da sauran harkokin siyasa ba su koma kai wa juna hari, gaba ko wasu ayyukan da za su iya haddasa rarrabuwar kawuna tsakanin al’umma ba.