Gobara ta ƙone wani ofishin hukumar kwastam a Lagos

Wata gobara ta tashi a ofishin hukumar kwastam ta Najeriya (NCS) reshen kula da harkokin tashar jiragen ruwa na yamma da ke Apapa, Lagos a ranar Litinin. 

An ce gobarar ta fara ne da misalin ƙarfe 10:23 na safe sakamakon cikas na lantarki a ɗakin taro, kafin ta bazu zuwa wasu sassan ginin. 

Jami’an da ke bakin aiki sun yi bakin ƙoƙarinsu dan kashe wutar kafin jami’an hukumar kashe gobara ta jihar Lagos su iso da misalin ƙarfe 10:45 na safe. 

Timothy Jonah, mataimakin kwamishinan kwastam wanda ya fara aiki a ranar bayan da ya  karɓi ragamar ofishin daga wanda ya gabace shi, ya bayyana lamarin a matsayin abin takaici. 

Ya ce: “Na fara aiki yau bayan karɓar ragamar ofishin, sai ga gobara ta tashi.” 

“Duk wani ƙalubale, ko da kuwa mara kyau ne, dama ce ta ƙarfafa ayyukanmu. A halin yanzu, za mu kafa kwamitin bincike kan musabbabin gobarar.” 

Jonah ya yaba da gaggawar jami’an da ke bakin aiki da kuma haɗin gwiwar su da hukumar kashe gobara. 

Ya ƙara da cewa ofishin zai ɗauki matakan ƙarfafa tsare-tsaren tsaro domin kauce wa sake faruwar irin wannan.