An gano gawarwakin wasu yara uku a wata gona a jihar Ondo

’Yan uwa uku, ciki har da tagwaye masu shekara 11, aka samu gawarwakin su  a gona kusa da Owena Army Barracks a jihar Ondo. 

Mai magana da yawun rundunar ’yan sanda ta jihar Onodo  Abayomi Jimoh, ya ce lamarin ya faru ne a ranar Lahadi. 

Waɗanda suka rasu sun haɗa da Joshua Jonah, mai shekara 11; ɗan uwansa tagwaye Jacob Jonah, mai shekara 11; da ƙanwarsu Blessing Jonah, mai shekara 5. 

A cewar Jimoh, yaran sun raka mahaifinsu, Samuel Jonah, zuwa gona a ranar Juma’a, amma daga baya suka tafi gida. 

Ya ce mahaifinsu ya damu bayan dawowa gida ya gano cewa yaran ba su dawo ba, hakan ya sa aka fara bincike. 

Jimoh ya ƙara da cewa an gano gawarwakin ’yan uwan uku a ranar Asabar, 5 ga Satumba, “a gefen ƙaramin kogi da ke cikin gonar.” 

Ya ce ’yan sanda sun fara ƙoƙarin gano yadda lamarin ya faru. 

Kwamishinan ’yan sanda na jihar, Felix Ohagwu, ya bayar da umarnin gudanar da bincike kan lamarin. 

Rundunar ta ce tana “rubuta dukkan bayanai da yanayi da suka shafi wannan mummunan lamari” domin gano musabbabin mutuwar yaran. 

Ohagwu ya yi ta’aziyya ga iyalan da abin ya shafa tare da tabbatar musu da cewa rundunar ’yan sanda za ta ci gaba da bincike don gano dukkan bayanan da suka shafi wannan masifa.