Inuwa Garba mamba dake wakiltar mazabar Yamaltu Deba a majalisar wakilai ta tarayya ya sauya sheka daga jam’iyyar PDP ya zuwa APC abun da ake ganin zai karawa APC ƙarfi a jihar Gombe.
Gwamnan jihar Gombe, Muhammad Inuwa Yahaya shi ne ya karbi Garba a gidan gwamnatin jihar dan majalisar ya nunawa gwamnan katinsa na jam’iyar APC da ya karɓa a mazaɓarsa ta Lubo dake ƙaramar hukumar Yamaltu/Deba abun da ke nuna cewa ya zama cikkaken dan jam’iyyar APC.
Da yake bayyana dalilinsa na sauya shekar dan majalisar ya alakanta haka da shugabanci nagari da kuma mulkin ciyar da al’umma gaba na gwamnatin gwamna Inuwa Yahaya tare da kuma tsare-tsaren cigaba da gwamnatin shugaban kasa, Bola Ahmad Tinubu take yi.
A cewar sa salon mulkin jam’iyar APC a matakin jiha da kuma tarayya ya yi dai da irin fatan da yake da shi na samar da cigaba cikin sauri ga al’ummar mazaɓarsa.
