Aƙalla masu hakar ma’adanai 37 ne aka ruwaito sun mutu bayan da suka shaki gurɓatacciyar iskar Carbon Monoxide a cikin ramin da suke aiki a wurin hakar ma’adanai dake Zurak a ƙaramar hukumar Wase ta jihar Filato.
A cewar Zagazola Makama dake wallafa bayanai kan sha’anin tsaro lamarin ya faru ne da tsakar daren ranar Talata.
Masu hakar ma’adanai wanda yawanci matasa ne da shekarunsu ya kama daga 25 zuwa 35 na gudanar da aikinsu kamar yadda suka saba lokacin da su ka shaki iskar mai guba wacce ta fito daga cikin ramin.
Wani da ya sheda abun da ya faru ya ce mutanen sun yanke jiki sun faɗi a cikin ramin bayan shaƙar iskar.
Mutane 25 ne daga cikinsu aka garzaya da su asibiti mafi kusa domin samun kulawar likitoci.
Joyse Ramnap kwamishiniyar ma’adanai ta jihar Filato ta tabbatar da faruwar lamarin sai ta ce bata da cikakken bayani kan adadin mutanen da suka mutu.
