Dakarun rundunar Operation Haɗin Kai sun kama kuɗaɗen da yawansu kai miliyan 37 da kuma wayoyin hannu da dama wanda ake zargin ana amfani da su wajen daukar nauyin ayyukan ta’addanci a jihar Borno.
A wata sanarwa da aka fitar ta bakin Sani Uba jami’in yaɗa labarai na rundunar tsaron haɗin gwiwa a yankin arewa maso gabas ya ce an samu nasarar gano kudaden ne yayin bincike a shingen binciken ababen hawa na sansanin sojoji dake Chabbal.
Uba ya ce sojojin sun tsayar da wata mota dake dauke da mutane biyar uku maza biyu mata inda suka gano kudi miliyan ₦37 a kunshe a cikin buhu.
Ya kara da cewa an kuma gano wayoyin hannu da dama da aka yi ittifaƙin na da alaka da tsara yadda ake aikin ta’addanci.
