Mai martaba Sarkin Bauchi Alhaji Rilwani Sulaiman Adamu ya jagoranci dubban al’ummar Musulmi wajen yin addu’a ta musamman, inda ya nemi Allah ya kawo mana daukin ruwan sama a masarautu da jihar.

An gudanar da Sallar ne a babban filin Idi a ranar Talata.

An bayyana cewa an fara sallar ta musamman ne a masallacin Juma’a na Gwallaga cikin Bauchi da misalin karfe 8 na safe, da kuma duk filin Idi na kungiyar Izalah da ke fadin babban birnin jihar.

Jagoran kungiyar JIBWIS ta jiha ya bukaci mambobinta da ke fadin jihar da su halarci addu’o’in musamman na samun ruwan sama.

Garba Hassan, shugaban JIBWIS na jihar Bauchi, ya umurci dukkan shugabannin kananan hukumomin da su hada kan mambobinsu domin gudanar da Salloli har sai an cimma manufofinsu.