Za mu  sauko da farashin man fetur ƙasa a cewar Kwankwaso

Rabiu Musa Kwankwaso, ɗan takarar mataimakin shugaban ƙasa na jam’iyyar Nigeria Democratic Congress (NDC), ya ce jam’iyyar za ta dawo da tallafin man fetur ta wata hanya dabam idan aka zaɓe su a 2027. 

Yayin wata hira da gidan Talabijin na Arise News, tsohon gwamnan Kano ya bayyana cewa NDC za ta ɗauki wata sabuwar hanya wajen tallafi, ciki har da faɗaɗa ƙarfin tace mai a cikin gida. 

“Za mu dawo da tallafi a hanyarmu,” a cewar sa

“Akwai hanyoyi da dama. Na farko, zan iya faɗa maka yanzu, akwai wata matatar mai da wani ɗan kasuwa ya gina. Kuma ina da tabbacin za a gina ƙarin wasu matatun mai. 

“Idan ’yan kasuwa a wannan ƙasa za su iya gina matatar mai, ban ga dalilin da zai hana gwamnati ta gina matatar mai ko matatun mai ba ta hanyar wani tsari har sai mun cimma buƙatar da ake nema. 

“Me ake nufi da buƙatar da ake nema? Buƙatar ita ce mutane a fadin ƙasa su iya zuwa gidan mai su sayi mai a farashi mai sauƙi. 
Mu a NDC za mu yi duk abin da ya dace domin rage farashin mai.” 

Kwankwaso ya ce manyan ’yan takarar shugaban ƙasa uku a zaɓen 2023 sun yi alkawarin cire tallafi, amma ya soki Shugaba Bola Tinubu saboda cire shi nan take bayan ya hau mulki. 

Ya ce wannan mataki ya jawo matsin tattalin arziki da ’yan Najeriya ke fuskanta yanzu. 

“A 2023, lokacin kamfen, na tuna su duka uku dukkansu sun ce za su cire tallafi. A gaskiya, kafin nan, Atiku ma ya ƙara da cewa zai sayar da dukkan matatun mai huɗu ga abokansa,” in ji shi. 

“Daga cikin su uku, Bola Tinubu ne ya yanke shawarar cire tallafi. Kuma sakamakon da muka yi tsammani ya tabbata. 
Ba wai kawai ya yanke shawarar cire tallafi ba, abin da ya yi shi ne ya cire shi nan take, maimakon ya yi la’akari da matsalolin da ke tattare da hakan.  Shi ya sa muka tsinci kanmu cikin wannan matsalar tattalin arziki. Yanzu kowa ya gane cewa kuskure ne.” 

Kwankwaso ya kuma zargi Atiku Abubakar, ɗan takarar African Democratic Congress (ADC), da yin alkawarin cire tallafi saboda siyasa. 
Ya ce Atiku, wanda ya tsaya takara a PDP a 2023, yana ƙoƙarin amfani da fushin jama’a ta hanyar yin alkawarin da ya taɓa cewa ba zai cika ba, ba tare da bayyana yadda za a aiwatar da shi ba. 

“Amma ka ga, abin da Wazirin Adamawa ya yi siyasa ce kawai. Ban yi imani da cewa ya nufi abin da ya faɗa ba,” in ji Kwankwaso. 

“Na farko kenan. Na biyu kuma, gaskiya bai faɗa wa kowa yadda zai yi shi ba. 
Amma ya san mutane yanzu sun shiga cikin matsin lamba. Idan ka fita ka ce kawai, ‘Zan cire shi,’ ko da kuwa ka taɓa faɗa sau da dama cewa ba za ka cire shi ba.” 

—