Wani mutum a kasar Rasha ya harbe mutum biyar saboda sun dame shi da surutu a kofar gidansa da dare.
‘Yan sanda sun ce lamarin ya faru ne a kauyen Yelatma da ke yankin Ryazan mai nisan kilomita 200 daga kudu maso gabashin birnin Moscow.
Yankin yana killace saboda annobar coronavirus da ake fama da ita.
Bincike ya nuna cewa mutumin ya gargadi mutanen daga barandar benensa. Nan take hayaniya ta barke tsakaninsu kuma ya bude musu wuta da wata bindigar farauta.
Maza hudu da mace daya sun mutu nan take sakamakon raunin da suka ji da karfe 10:00 na daren Asabar, a cewar kwamitin da ke binciken lamarin.
An kama wanda ake zagin da ba a bayyana sunansa ba. An bincika gidansa kuma aka kwace bindigar tasa.