Tsohon sakataren gwamnatin jihar Yobe, Baba Malam Wali ya zama ɗan takarar gwamnan jihar karkashin jam’iyar APC a zaɓen shekarar 2027.
Wali mai shekaru 68 an ayyana shi a matsayin wanda ya lashe zaɓen fidda gwani na yan takarar kujerar gwamnan jihar da aka gudanar a dakin taro na gidan gwamnatin jihar dake Damaturu.
Da yake sanar da sakamakon zaɓen shugaban kwamitin zaɓen, Engr Muttaqah Rabe Darma ya ce an gudanar da zaɓen kamar yadda kundin tsarin mulkin jam’iyar ya tanada da kuma dokar zaɓe ta shekarar 2026.
Ya ce Wali ya samu kuri’a 236,711 inda ya kayar da sauran ƴan takarar da su ka haɗa da Dr Abubakar Bukar Kagu wanda ya samu kuri’a 9,748.
Hon Bashir Sherif Machina ya samu kuri’a 1894 a yayin da Engr Mustapha Tunda Maihaja ya samu kuri’a 1178.
Darma ya kara da cewa, Hamisu Alhaji Muhammad ya samu kuri’a 1,722, Inusa Muhammad ya samu kuri’a 1,148 a yayin da Ma’aji Masu ya samu kuri’a 1,371.
