Rundunar tsaro ta NSCDC da aka fi sani da Civil Defence ta samu nasarar kama wasu mutane biyar da ake zarginsu da kasancewa mambobi na gungun wasu barayin babura da da wayoyin hannu dake gudanar da ayyukansu a jihar Gombe.
A cikin wata sanarwa da aka fitar, CSP Buhari Sa’ad mai magana da yawun rundunar a jihar ya ce an yi kamen ne biyo bayan tattara wasu bayanan sirri a Æ™ananan hukumomin Billiri, Balanga, Akko da kuma Gombe
A cikin waɗanda aka kama akwai Haruna Hamman wanda ake zargi da satar babur ƙirar Boxer mallakin wani mai suna Adamu Buga.
Babur din da aka sace a ranar 15 ga watan Afirilu daga bisani an gano shi a Gombe lokacin da jami’an hukumar ta NSCDC su ke gudanar da aikin sintiri.
Rundunar ta kuma kama wani mai suna, Nura Adamu mai shekaru 29 daga garin Bambam a karamar hukumar Balanga inda ake zarginsa da mallakar babur din sata kirar Jincheng Kasea.
Har ila yau rundunar ta kama wani mai suna, Ishiyaka Ahmad mai shekaru 20 a cikin garin Gombe da aka samu da laifin fasa gida inda ya saci Laptop, power bank da kuma na’urar router.
Rundunar ta ce za ta cigaba da gudanar da bincike domin lalubo sauran abokan aikata laifin nasu a yayin da za a gurfanar da su ukun da aka kama a gaban kotu.
