Matatar Dangote Petroleum Refinery ta sanar da rage farashin litar fetur da take sayarwa ga dillalai daga N1,215 zuwa N1,165, wanda ya nuna ragin N50 kan kowace lita.
Haka kuma, kamfanin ya rage farashin dizal daga N1,650 zuwa N1,570 kan kowace lita, wato ragin N80.
A cikin wata sanarwa, matatar ta bayyana cewa matakin ya nuna kudirinta na samar da man fetur mai inganci a farashi mai sauki, tare da kara saukaka samun makamashi ga ‘yan Najeriya.
Kamfanin ya ce rage farashin zai taimaka wajen bunkasa harkokin tattalin arziki, rage dogaro da shigo da man fetur daga kasashen waje, da kuma tabbatar da wadataccen man fetur a kasuwannin Najeriya. Haka kuma ya tabbatar da cewa zai ci gaba da mika amfanin inganta ayyukansa ga masu amfani da man fetur idan yanayin kasuwa ya ba da dama.
Matatar Dangote Ta Rage Farashin Fetur Da Dizal
