Hakkin mallakar hoto
Getty Images
Barcelona ta yi nasara a kan Inter Milan a wasa na biyu na cikin rukuni da ci 2-1 a gasar cin kofin Zakarun Turai ta Champions League da suka buga ranar Laraba.
Inter ce ta fara cin kwallo ta hannun Lautaro Martinez sannan ya kusa kara na biyu a karawar da suka yi a Nou Camp.
Barcelona ta farke ne ta hannun Luis Suarez a wata kwallo mai kayatarwa da ya ci, bayan da Arturo Vidal ya buga masa tamaular.
Daga baya Lionel Messi wanda ya kammala jinya ya bai wa Suarez kwallo shi kuma ya yanka Diego Godin ya zura ta biyu a ragar Inter.
Kwallaye biyun da Suarez ya ci sune na farko da ya yi wannan bajintar a gasar Champions League tun bayan shekara uku.
Barcelona wadda ba a doke ta a wasa 33 a Champions League ba a gida ta hada maki hudu irin wanda Borussia Dortmund keda shi.
